Լիբանանում հայտարարել են, որ երբեք չեն աջակցի իսրայելա-պաղեստինյան հակամարտության՝ ԱՄՆ-ի «դարի գործարքին»

ԱՄՆ 29 Հունվար, 2020 12:11

Լիբանանի նախագահի խորհրդական Ամալ Աբուզեյդը հայտարարել է, որ Լիբանանը վճռականորեն դեմ է պաղեստինյան փախստականներին իրենց ժամանած երկրներում հպատակագրման ուղղորդող իսրայելա-պաղեստինյան հակամարտության լուծման՝ ԱՄՆ-ի «դարի գործարքին» և չի փոխի իր դիրքորոշումը անգամ տնտեսական և ֆինանսական ճնշումների պարագայում: Այս մասին տեղեկացնում է РИА Новостиգործակալությունը:

Լիբանանում սեփական 4 միլիոն բնակչության հետ համատեղ ապրում են 600 000 պաղեստինցի և 1,5 միլիոն սիրիացի փախստականներ: Պաղեստինցիները հատուկ կարգավիճակ ունեն և ապրում են փախստականների համար կառուցված ճամբարներում, որոնք ժամանակի ընթացքում վերածվել են խիտ բնակեցված քաղաքային թաղամասերի` փռված ողջ Լիբանանի տարածքում:

«Մենք արդեն գոյատևման սահմանին ենք այն բանից հետո, երբ Լիբանանը 30 տարի խորտակվում էր պարտքերի մեջ, որը մեզ բերեց ամենածանր ֆինանսական, տնտեսական և հասարակական ճգնաժամին: Սա միջազգային խաղ է, որը երկրին բերել է հետևյալ վերջնագրին. կա՛մ համաձայնություն հպատակագրմանը, կա՛մ էլ օգնություն և պարտքերի ներում չի լինի»,-գրել է Աբուզեյդը Twitter-ի իր էջում:

Նա նաև ընդգծել է . «Լիբանանը, ինչպես և առաջ, դեմ է «դարի գործարքին» և հերթական անգամ հայտարարում է, որ չի աջակցում Լիբանանի և նրա շահերի հաշվին իրականացվող ոչ մի միջազգային խաղի և դավադրության, ինչպիսին էլ լինի այս դիրքորոշման գինը»:

«Հավատարիմ ենք մնում մեր օրինական իրավունքին` պաշտպանել մեր հայրենիքի ինքնիշխանությունն ու մեր Սահմանադրության հիմքերը, որտեղ պարզ գրված է՝ ոչ մի հպատակագրում և բաժանում: Մենք թույլ չենք տա կասկածելի նախաձեռնությունների առաջխաղացման համար Լիբանանը դարձնել թույլ օղակ»,-հայտարարել է Լիբանանի նախագահի խորհրդականը:

Աբուզեյդը նշել է, որ ԱՄՆ-ի նախաձեռնությունը, որը նրանք անվանել են Մերձավոր Արևելքում խաղաղության ծրագիր, ավելի շուտ հանդիսանում է «աշխարհը քանդելու ծրագիր» և բացասական կազդի նաև Լիբանանի ինքնիշխանության և ժողովրդագրության վրա, որովհետև դրա հիմքում ընկած է պաղեստինցի փախստականների` հարևան երկրներում հպատակագրման հին գաղափարը:

Հունվարի 28-ին ԱՄՆ նախագահ Դոնալդ Թրամփը հրապարակել է Իսրայելի և Պաղեստինի նոր սահմանների քարտեզը՝ ըստ իր առաջարկած «դարի գործարքի»: Հրապարակված քարտեզով Պաղեստինը, ենթադրաբար, երկու մայրուղիներով կմիանա Հորդանանի սահմանային անցումներին: Պաղեստինյան Արևմտյան ափը Հորդանանից կբաժանվի իսրայելական տարածքի գծով: Ըստ Թրամփի առաջարկած քարտեզի՝ սիրիական Գոլանի բարձունքները Իսրայելի տարածք են հանդիսանում: