ՍԴ նախագահը հանդես է գալիս քաղաքական ընդդիմախոսի դիրքերից, ինչը նրան պաշտոնի հետ անհամատեղելի է դարձնում. «Իմ քայլ»

Քաղաքական 29 Հունվար, 2020 12:51

Սահմանադրական դատարանի նախագահը չպետք է հանդես գա քաղաքական ընդդիմախոսի դիրքերից, ինչն այսօր տեղի է ունենում և Հրայր Թովմասյանին անհամատեղելի դարձնում այդ պաշտոնի հետ: Այս մասին ԱԺ-ում ճեպազրույցի ժամանակ հայտարարել են «Իմ քայլը» խմբակցության անդամները՝ անդրադառնալով Թովմասյանի երեկվա հարցազրույցին:

«Հստակ պետք է տարանջատել անձերին` դատավորներին, անդամներին ՍԴ ինստիտուտից ի՞նչ իմաստով, ինձ` որպես ԱԺ պատգամավոր, ՍԴ դատավորը հետաքրքրում է միայն անաչառության տեսանկյունից և այն, որ տվյալ անձը չի ենթարկվում արտաքին գործոններին: Ի՞նչ է տեղի ունենում ՍԴ ինստիտուտի հետ կապված: ՍԴ-ն` որպես ինստիտուտ, 2015թ. Սահմանադրականան փոփոխություններից հետո լիարժեք չի գործում, որովհետև ՍԴ-ում գործում են երկու տարբեր ռեժիմներ դատավորների, անդամների համար: Այն անցումային դրույթները, որոնք նախորդ Սահմանադրությունից պետք է անցում կատարեին, թերի է, թե որն է պատճառը, բնավ չմտնելով դաշտ, թե դիտավորությա՞մբ է արվել, թերացո՞ւմ է, թե՞ ինչ, պարզապես ուզում եմ արձանագրել, որ անցում նախկին ռեժիմից ներկային արված չէ»,-ասաց Մակունցը:

Իսկ «Իմ քայլը» խմբակցության անդամ Վահագն Հովակիմյանը նշել է.

«Հրայր Թովմասյանի հայտարարությունները տեղավորվում են քաղաքական ընդդիմախոսի լեքսիկոնին հարիր ձևակերպումների մեջ, ինչը չպետք է լինի: ՍԴ նախագահը հանդես է գալիս քաղաքական ընդդիմախոսի դիրքերից, ինչը նրան պաշտոնի հետ անհամատեղելի է դարձնում, հենց այն ձևակերպումը վերցնենք` «գնալու եմ մինչև վերջ»: Եղել են իրավիճակներ, երբ ընդդիմությունը Գագիկ Հարությունյանին է քննադատել, բայց երբեք լեքսիկոնի մեջ չի օգտագործել արտահայտություններ, որոնք նրան թույլ կտան հանդես գալ քաղաքական ընդդիմախոսի դիրքերից»:

«ՍԴ նախագահի պարտականությունները կատարողը խոսում է Արցախի հիմնախնդրից, սա ի՞նչ է, եթե ոչ քաղաքական խոսք»,- նույն հարցին անդրադառնալով ասաց Հայկ Կոնջորյանը: