ԶԱԳՍ-ը, թաղապետարանն ու հիվանդանոցը երեխայիս բարուրով վաճառել են

«ԶԱԳՍ-ը, թաղապետարանն ու հիվանդանոցը երեխայիս բարուրով վաճառել են, տիկին Ղուկասյան, դուք եք Ռազմիկ Աբրահամյանի հետ երեխայիս որդեգրման հանձնել»,- երեխային ծննդաբերած և այդպես էլ չտեսած Սյուզաննա Պատվականյանը և նման պատմություններ ունեցող այլ մայրեր կրկին Աջափնյակի ՔԿԱԳ-ում են ու վիճաբանություն են սկսել ՔԿԱԳ-ի պետի հետ:

Մայրերը պահանջում են իրենց երեխաների տվյալները, որոնց մեջ կարող են գտնել` երբ և ինչպես են մահացել երեխաները կամ ինչպես են որդեգրվել: Մայրերի պնդմամբ` տվյալների մեծ մասը հակասում են իրար, գործերում տարբեր ու չհամընկնող փաստեր են լրացված:

«Մեռելածին երեխային անուն ազգանուն են դրել, հայրը չի դրել, մայրը չի դրել, ո՞վ է դրել` չգիտեն: Ազգանուն են փոխել, հայրանուն են փոխել, որ մեկն ասեմ, հազար բան են կեղծել, իրենք էլ են խճճվել կեղծիքի մեջ»,- ասում է երեխային կորցրած Հայկուհի Խաչատրյանը:

Ի պատասխան մայրերի պահանջի` ՔԿԱԳ-ի Աջափնյակի և Դավթաշենի տարածքային բաժնի ղեկավար Անահիտ Ղուկասյանն ասաց, որ օրենքը չի թույլատրվում տվյալներ հրապարակել, բացի այդ 2012թ-ի հիմնային փաստաթղթերն ու դիմումները այրված են:

«Ակտային գրանցումն այրված չի, բայց էն, ինչ բերվել է հիվանդանոցից, այրված է: Դիմումներն ու հիմնային փաստաթղթերը 5 տարին մեկ այրվում են: Այրման կարգով ոչնչացվում է»:

Մայրերը կապ հաստատեցին իրավաբանի հետ, ով էլ պնդեց, որ ծնողի դիմումի համաձայն` հնարավոր է վերցնել երեխայի ցանկացած տվյալ` առանց խոչընդոտի: Ղուկասյանը փոխեց տեսակետն ու մայրերին հորդորեց լսել իրավաբանին և դիմում գրել, հետո վերադառնալ դիմումի պատասխանները վերցնելու։ Մայրերը դիմումներ գրեցին, որոնց պատասխանները կստանան երկուշաբթի օրը։