Կոպիտ զեկույց ԵԽԽՎ-ից. ո՞ւմ կսթափեցնի

ԵԽԽՎ Մոնիթորինգի հանձնաժողովի՝ Հայաստանի հարցերով համազեկուցողներ Անդրեյ Շիրցելը և Կիմմո Կիլջունենը հունվարի 31-ին հայտարարություն են տարածել Հայաստանում ՍԴ-ի շուրջ ստեղծված իրավիճակի վերաբերյալ: Զեկույցում մասնավորապես ասվում է.«Զսպվածությունը և հավասարակշռությունը ժողովրդավարական համակարգի կարևոր բաղադրիչներից են: Սա ենթադրում է, որ բոլոր ինստիտուցիոնալ իշխանությունները պետք է գործեն օրենքի գերակայության սկզբունքի համաձայն և իրենց գործողություններում ու արտահայտություններում հարգեն այն, այդ թվում՝ անմեղության կանխավարկածի սկզբունքի շրջանակներում: Եթե նրանց մոտ չստացվի գործել այս սկզբունքների համատեքստում, նրանք քայքայում և վնասում են միմյանց: Հետևաբար, մենք անհանգստացած ենք, որ այս լարվածությունը, որ հասել է աննախադեպ մակարդակի, կարող է ամբողջ դատական համակարգին երկարաժամկետ վնասներ հասցնել»:

Զեկույցի կարևորության և հետևանքների մասին ԼՈՒՐԵՐ.com-ի թղթակիցը զրուցեց քաղաքագետ Ստեփան Դանիելյանի հետ:

«Սովորաբար նման միջազգային զեկույցների լեզվական ոճը բավականին զուսպ է լինում: Նախ նշվում են դրական կողմերը, որից հետո նոր անցնում են քննադատությանը: Այս ամենը հաշվի առնելով՝ վեր ընշված զեկույցը բավական կոպիտ էր ձևակերպումների մեջ: Բացի այդ, զեկույցն իր մեջ պարունակում էր գնահատականներ և զգուշացումներ»,-ասաց քաղաքագետը:

Հարցին, թե այս զեկույցը հնարավո՞ր է համարել սթափեցնող՝ գործող իշխանության համար, Դանիելյանը պատասխանեց. «Ես տարանջատում կմտցնեմ իշխանության և Փաշինյանի միջև, քանի որ մեր իշխանության մեջ կան բավականին սթափ մտածող մարդիկ, ովքեր չեն ողջունում ՍԴ-ի հետ կապված իրավիճակը, քանի որ գիտեն՝ դա կարող է մեր պետության համար խնդիրներ առաջացնել: Իսկ ինչ վերաբերում է Փաշինյանին, ապա կարծում եմ, որ ինչ-որ չափով կսթափեցնի: Կուժեղանա նաև իշխանական թևի  այն մարդկանց տեսակետները, ովքեր դեմ են նրա քաղաքականությանը: Միևնույն ժամանակ, հաշվի առնելով Նիկոլ Փաշինյանի անձի անհատական, անզուսպ հատկությունները, կարծում եմ, որ լիարժեք ձևով չի սթափեցնի և նա կփորձի այլ ձևով այդ խնդիրը լուծել»:

Քաղաքագետը ընդգծեց, որ այս զեկույցով ոչ թե ընկնում է Հայաստանի հեղինակությունը, այլ՝ Հայաստանի ներկայիս իշխանության հեղինակությունը: 

«Նոր իշխանությունը եկել է հեղափոխության և դեմոկրատիայի հաղթանակի իմիջով: Եվ սկզբնական փուլում՝ հատկապես Եվրոպայում, մեծ հույսեր էին իր հետ կապում: Այս զեկույցը ցույց է տալիս, որ այդ հույսերը հիմնականում սին են: Եկել է ոչ ժողովրդավար իշխանություն, որը ուզում է ամբողջովին տիրանալ իշխանությանը՝ եղանակների մեջ որևէ տարբերություն չդնելով: Այս առումով, իշխանության և անձամբ Փաշինյանի հեղինակությունը միջազգային եվրոպական ատյաններում բավականին անկում կապրի, առավել ևս, որ այդ անկումը վաղուց է սկսվել և արդեն շատ գործընկերներ Փաշինյանին որպես լուրջ քաղաքական գործիչ չեն դիտարկում: Զեկույցը ևս մի քայլ էր նետված այդ ուղղությամբ»,- նշեց Դանիելյանը: