ԱՄՆ Ներկայացուցիչների պալատի խոսնակը պատռել է Թրամփի ելույթի տեքստը (տեսանյութ)

Երեկ երեկոյան Կոնգրեսում ԱՄՆ նախագահ Դոնալդ Թրամփի ելույթի ժամանակ մի քանի ոչ միանշանակ դրվագներ են տեղի ունեցել, հաղորդում է «ՌԻԱ Նովոստի»-ն:

Սենատորների եւ Ներկայացուցիչների պալատի անդամների առջեւ երկրի իրավիճակի մասին նախագահի ելույթը համարվում է ավանդական ամենամյա ուղերձ: Դրա ընթացքում պահպանվում են պետության ղեկավարի եւ օրենսդիրների կողմից ընդունված մի շարք գործընթացներ:

Մասնավորապես, դրանցից մեկը ենթադրում է, որ նախագահը ելույթից առաջ իր տեքստը փոխանցում է ԱՄՆ փոխնախագահին, որը համարվում է Սենատի ղեկավարը, ինչպես նաեւ Ներկայացուցիչների պալատի խոսնակին: Սովորաբար դա ուղեկցվում է ձեռքսեղմամբ, ինչպես անցած տարի:

Խոսնակը նարդային ժպտացել է, իսկ հետո բոլորի ներկայությամբ պատռել է Թրամփի ելույթի թղթապանակի բոլոր էջերը եւ բարկացած նետել սեղանին:

Իր հերթին, Փենսը չի անտեսել Փելոսիին եւ սեղմել է նրա ձեռքը:

Բացի այդ, ԶԼՄ-ները ուշադրություն են դարձրել, որ սովորաբար Պալատի խոսնակը պետության ղեկավարի ելույթից առաջ նրան ներկայացնում է Կոնգրեսի անդամներին՝ ասելով. «Ինձ համար մեծ պատիվ է ներկայացնել Միացյալ Նահանգների նախագահին…»: Սակայն այս անգամ Փելոսին սահմանափակվել է հետեւյալ խոսքերով. «Կոնգրեսի անդամներ, Միացյալ Նահանգների նախագահը»: Դրանից հետո դահլիճում հանրապետականները սկսել են բղավել՝ «եւս 4 տարի»՝ նկատի ունենալով նոյեմբերին Թրամփի վերընտրումը, քանի որ հակառակ դեպքում Կոնգրեսի առաջ ելույթ կունենա այլ նախագահ:

Մեկնաբանելով իր պահվածքը՝ Փելոսին լրագրողներին հայտնել է, որ «դա իր կողմից հարգալից վերաբերմունք էր՝ հաշվի առնելով այլընտրանքները, որոնք նա ուներ Թրամփի նկատմամբ»: «Դա անպիտան ելույթ էր»,- հավելել է նա:

Հարկ է նշել, որ Թրամփի ելույթը տեղի է ունեցել իմպիչմենթի ֆոնին, որը նրա դեմ հայտարարել են Ներկայացուցիչների պալատի դեմոկրատները՝ Փելոսիի գլխավորությամբ: Չորեքշաբթի Սենատում պետք է ամփոփիչ քվեարկություն անցկացվի, որի արդյունքում կորոշվի՝ արդյոք օրենսդիրները նախագահին մեղավոր են ճանաչում կամ ոչ: Ակնկալվում է, որ Թրամփին կարդարացնեն:

Թրամփը դարձել է ԱՄՆ պատմության մեջ երրորդ նախագահը, ում իմպիչմենթ են հայտարարել: Դեմոկրատները հայտարարում են, որ նա ձգձգել է Կոնգրեսի հավանությանն արժանացած ռազմական օգնության տրամադրումն Ուկրաինային՝ փոխարենը Ուկրաինայի նախագահ Վլադիմիր Զելենսկուց պահանջելով քաղաքական ծառայություն՝ իր ընդդիմախոս Ջո Բայդենի դեմ հետաքննություն անցկացնելու տեսքով։ Ինքը՝ Թրամփը, հայտարարում է, որ ուկրաինական իշխանություններից պահանջել է միայն պայքար կոռուպցիայի դեմ:   

#Pelosi rips up Trump speech...?#SOTU#SOTU2020 #StateOfTheUnionhttps://t.co/C0c09nLuk3 pic.twitter.com/ryXBq9Tgmb

— RT (@RT_com) February 5, 2020