Չի՛ կարելի հանրաքվեի դնել մի հարց, որի արդյունքում իշխանության մի ճյուղը յուրացնում է մեկ այլ ճյուղի

ՍԴ-ի շուրջ ստեղծված իրավիճակի, սպասվելիք հանրաքվեի և դրա հնարավոր արդյունքների մասին  ԼՈՒՐԵՐ.com-ի թղթակիցը զրուցել է քաղաքագետ Երվանդ Բոզոյանի հետ:

«Ֆորմալ իմաստով՝ ցանկացած խնդիր կարելի է դնել հանրաքվեի, սակայն հանրաքվեի դնելու համար պետք է ՍԴ-ի թույլտվությունը ստանալ: Բացի սա, կա նաև տրամաբանական մի խնդիր՝ չի կարելի հանրաքվեի դնել մի հարց, որի արդյունքում իշխանության մի ճյուղը յուրացնում է մեկ այլ ճյուղի: Սա անտրամաբանական և անթույլատրելի գաղափար է: Այս պարագայում, մեր ժողովուրդը շատ կարճ ժամանակում կզգա, թե ինչ է նշանակում իսկական և բացարձակ բռնատիրությունը»,- ասաց քաղաքագետը:

Նրա խոսքով՝ մենք երբեք դեմոկրատական երկիր չենք եղել և մեզ մոտ միշտ եղել է փափուկ բռնատիրական համակարգ, մինչդեռ, եթե հիմա իշխանությունը հանրաքվեի արդյունքում հասնի իր նպատակին, ապա մեր ժողովուրդը կտեսնի բռնատիրություն. «Եթե մեր ժողովուրդը համակերպվի այս իրավիճակին, ապա դա ցույց կտա ժողովրդի խայտառակ ցածր գրագիտության աստիճանը»:

Փորձելով մեկնաբանել Փաշինյանի և իշխանական թևի այլ ներկայացուցիչների այն խոսքերը, որ ՍԴ փոփոխությունը հասարակության պահանջն է, Բոզոյանն ասաց. «Դա դեմագոգիայի վերջին աստիճանն է, քանի որ հանրությունը չի կարող համաձայնել, որ իշխանական ամբողջ լիազորություններն անցնեն մեկ մարդու ձեռքը: Կամ այդ հանրությունը դեգրադացված է, կամ անձը, ով այդպիսի բան է հայտարարում, զբաղված է դեմագոգիայով: Ժամանակը ցույց կտա, թե ով է ճիշտ: Եթե ճիշտ է այդ անձը, ապա մենք ունենք դեգրադացված հասարակություն: Այդ հասարակությունը իրավունք չունի երջանիկ ապրելու, Արցախ պահանջելու և պետություն կառուցելու»:

Քաղաքագետի խոսքով՝ ՍԴ շուրջ ստեղծված իրավիճակից շոկ է ապրում միջազգային հանրությունը. «Շոկ են ապրում, քանի որ  մեր երկրում նման բան են որոշվել: Աշխարհում իրեն հարգող, ցիվիլ ժողովուրդը չի համակերպվի, որ  իշխանության բոլոր ճյուղերը հանձնվեն մեկ մարդու: Չկա նման բան: Չեմ ուզում հավատալ, որ մեր հասարակությունն այնքան դեգրադացված է, որ նման բան կանի»: