Ամերիկայում այլընտրանքային ծխախոտին արտոնություն են տալիս, Հայաստանում՝ արգելում (տեսանյութ)

«Ծխախոտային արտադրատեսակների և դրանց փոխարինիչների օգտագործման հետևանքով առողջությանը հասցվող վնասի նվազեցման և կանխարգելման մասին» օրինագծի քննարկման համատեքստում այսօր մամուլի ասուլիսի ձևաչափով հանդես եկան  «Եռամիասնություն հանուն զարգացման» հասարակական կազմակերպության նախագահ, հասարակական գործիչ, իրավաբան Մամիկոն Խուրշուդյանը և բժշկական գիտությունների թեկնածու Մարատ Զաքարյանը:

Ասուլիսի բանախոսներն այն կարծիքին էին, որ նոր օրենքի բացերը շատ են, այն վերանայման կարիք ունի, հատկապես օրենքը խնդրահարույց է ծխախոտային արտադրանքին այլընտրանք համարվող էլեկտրոնային սիգարետների պարագայում:

«Այս օրինագծի հետ կապված ունեմ որոշակի տարակուսանք. ի՞նչ է նշանակում արգելել բոլոր տեսակի արտադրանքը, և ի՞նչ է նշանակում ամեն ինչը դնել մի գծի վրա և առաջ տանել: Այս մոտեցումը հիասթափեցնող է: 2004թ.-2005 թթ-ին ունեցել ենք արգելման հետ կապված օրենք, ինչո՞ւ առողջապահության նախարարությունը նույնքան հետևողական չէ այդ օրենքի կիրառելիության հետ կապված, ինչքանո՞վ ենք վստահ, որ բոլոր տնտեսվարողներին ստիպելով, հասարակական տեղաշարժեր անելով, բոլորին անհանգստացնելով, վերահսկողություն կիրառելով, մենք ազատվում ենք ծխելուց: Էլեկտրոնային ծխախոտները, իմ կարծիքով, առաջադեմ քայլ են, և ամբողջ Եվրոպան է այդ ծխախոտները ընդունում», - ասում է Մամիկոն Խուրշուդյանը:

ԼՈՒՐԵՐ.com-ի այն հարցին, թե ինչպիսի՞ն է այս հարցում առաջադեմ երկրների փորձը, տարբերակվա՞ծ են այլընտրանքները ծխախոտից, թե ոչ՝ Խուրշուդյանը պատասխանեց. «Օրենքի խնդրահարույց կողմն այն է, որ էլեկտրոնային ծխախոտը հավասարեցված է նարգիլեին, սակայն այն նորարարություն է և գրավում է ամբողջ աշխարհը: Էլեկտրոնային ծխախոտը գրավել է ճապոնական, ամերիկյան շուկան, այսինքն՝ այն անցել է միջազգային բարդ պրոցեսը: Որպես համեմատություն կարող եմ ասել, որ հայաստանյան բազմաթիվ արտադրատեսակներ չի մտնում ԱՄՆ, որովհետև չի համապատասխանում իրենց չափանիշներին: Եթե Ամերիկայում պետական համակարգը որոշել է այլընտանքներին արտոնություն տալ, ապա ծիծաղել է այն Հայաստանում արգելելը»:

Ասուլիսն առավել մանրամասնություններով դիտեք առաջարկված տեսանյութում.