Եթե չձևավորվի «Ոչ»-ի քարոզչության կողմ, վտանգն էլ ավելի մեծ կլինի․ Ռուբեն Մելիքյան

Մեր երկընտրանքը ոչ թե լեգիտիմությունն ու ոչ լեգիտիմությունն է, այլ իրավաչափությունն ու ոչ իրավաչափությունը։ Այս մասին այսօր լրագրողների հետ զրույցում ասաց «Իրավական ուղի» ՀԿ հիմնադիր Ռուբեն Մելիքյանը՝ անդրադառնալով «Ոչ»-ի շտաբ ձևավորելով հանրաքվեի հակասահմանադրական գործընթացը լեգիտիմացնելու մասին հարցին։

Նա 61 իրավաբանների նախաձեռնության փաստաթղթերը հանձնել է ԿԸՀ, որը 3 օրում որոշում կկայացնի՝ հաստատե՞լ, թե՞ ոչ։

«Մենք շարունակում ենք պնդել, որ այս գործընթացը ոչ իրավաչափ է եղել, թե՛ բովանդակային, թե՛ ընթացակարգային առումով այս հանրաքվեի նշանակումը հակասահմանդրական է։ Անկախ նրանից՝ ներգրավվածություն կա՞, թե՞ չկա, ոչ իրավաչափ լինելը չի դադարում»,-ասաց Ռուբեն Մելիքյանը՝ ընդգծելով, որ իրենց նախաձեռնության անդամները բացառապես պետական համակարգից դուրս իրավաբաններ են և, չլինելով քաղաքական գործիչներ՝ իրենք չեն կարող լեգիտիմացնել կամ ապալեգիտիմացնել որևէ բան։  

«Մենք կարծում ենք՝ այս գործընթացը էլ ավելի մեծ վտանգ կարող է լինել մեր պետականության համար, եթե չձևավորվի «Ոչ»-ի քարոզչության կողմ․ նպատակը «Այո»-ն բացառող քաղաքացիներին հարթակ տրամադրելն է, երկրորդը՝ վերահսկողական մեխանիզմներ ունեցողներին՝ վստահված անձինք, հանձնաժողովի անդամներ հնարավորություն տալը, որ այդ վերահսկողությունը գործադրվի»,-ասաց նա։

Ռուբեն Մելիքյանը վստահեցրեց, որ հանձնառել են քաղաքական բնույթի հայտարարություններ չանել և խոսել գործընթացի իրավական կողմի մասին․ «Հետևելու ենք, որ թշնամանքի, ատելության բովանդակությունից զերծ ուղերձներ լինեն և նույնը ակնկալում ենք համարժեք մոտեցում հակառակ կողմից։ Սա շատ կարևոր է, քանի որ հիմա մեր երկրում առկա է ատելության մթնոլորտ և մենք հույս ունենք, որ այս գործընթացը կբերի ոչ թե դրա շիկացմանը, այլ նվազմանը»։

Հարցին, թե ուրիշ ինչ ձև են պատկերացնում իրենց քարոզարշավը, Մելիքյանը պաատասխանեց․ «Այդ ամենի մասին կարող ենք խոսել բացառապես գրանցումից հետո, որովհետև ճիշտ չեմ համարում չունենալով կարգավիճակ՝ գնալ երկու քայլ առաջ»։