Շվեյցարիայի նախագահն իր ծննդյան 60-ամյակին հրավիրել է երկրի բոլոր քաղաքացիներին

Շվեյցարիայի նախագահ Սիմոնետա Սոմարուգան իր ծննդյան 60-ամյակին հրավիրել է երկրի բոլոր այն քաղաքացիներին, ովքեր նույն օրն են ծնվել, հայտնում է The Local պարբերականի շվեյցարական խմբագրությունը, փոխանցում է «Ինտերֆաքս»-ը:

Տոնակատարության հնարավոր մասնակիցներին հարկավոր է գրանցվել նախագահի կայքում եւ տրամադրել իրենց անձնագրի պատճեն:

Մայիսի 14-ին Շվեյցարիայի նախագահը կդառնա 60 տարեկան: Ինչպես նշում է The Local-ը, 1960 թվականին երկրում 94372 երեխա էր ծնվել, հետեւաբար, միջինում օրական մոտ 260 շվեյցարացի է ծնվել, եւ մոտավորապես այդքանն էլ իրավունք ունեն մասնակցել նախագահի տարեդարձին: Սոմարուգան դեռ չի հայտնել խնջույքի մանրամասները: Հայտնի է միայն, որ տոնակատարությունը տեղի կունենա Բեռնի մերձակայքում: 

Սիմոնետա Սոմարուգան ստանձնել է Շվեյցարիայի Համադաշնության նախագահի պաշտոնը 2020 թվականի հունվարի 1-ին: