«Փաշինյանի հետ ենք ուզում հանդիպել» . ՁԻԱՀ-ի կենտրոնի աշխատակիցները բողոքի ակցիա են իրականացնում (տեսանյութ)

«Մեր ձայնը կտրելու համար տարբեր անօրինական քայլերի են դիմում, երեկ տեսաք` բերեցին ժամանակավոր պաշտոնակատար ներկայացրին, ով էլ առաջին օրով ասաց, որ պետք է միանանք Նորքի ինֆեկցիոնին: Նախարարության ամբիցիաները չենք հանդուրժելու: Ժամանակավոր պաշտոնակատարի անձի դեմ ոչինչ չունենք, մենք դեմ ենք միացմանը»:

ՁԻԱՀ-ի կանխարգելման հանրապետական կենտրոն» ՊՈԱԿ-ի աշխատակիցները կառավարության շենքի դիմաց բողոքի ակցիա են իրականացնում:

«Ուղիղ մեկ տարի է` մենք մասնագիտական քննարկում ենք պահանջում, պահանջում ենք, որ առողջ բանավեճ ծավալվի մասնագետների միջև, հիմնավոր պնդումներ ներկայացվի այսպիսի որոշման համար»:

Նշենք, որ Առողջապահության նախարարի հրամանով լուծարվել է ՀՀ ԱՆ «ՁԻԱՀ-ի կանխարգելման հանրապետական կենտրոն» ՊՈԱԿ-ի տնօրեն Սամվել Գրիգորյանի աշխատանքային պայմանագիրը` աշխատանքային պարտականությունները ոչ պատշաճ իրականացնելու հիմքով: Նախարարի մեկ այլ հրամանով՝ կենտրոնի ժամանակավոր պաշտոնակատար է նշանակվել Արթուր Բերբերյանը: Վերջինիս հետ կնքվել է ժամկետային աշխատանքային պայմանագիր` մինչև օրենսդրությամբ սահմանված կարգով տնօրենի թափուր պաշտոնի հիմքի վերացումը: Ժամանակավոր պաշտոնակատարը զբաղվելու է Կառավարության 2020 թվականի հունվարի 30-ի թիվ 77-Ա որոշման պահանջների կատարմամբ: Երեկ երեկոյան ՁԻԱՀ–ի կանխարգելման հանրապետական կենտրոնի փոխտնօրեն Արամ Հակոբյանը բերման է ենթարկվել ոստիկանության Նոր Նորքի բաժին՝ հիմնարկի կնիքը, բանալիներ և փաստաթղթեր նորանշանակ ղեկավարին չտալու համար։

Ավելի ուշ նրան ազատ են արձակել։