ՀՔԾ-ն պարզապես ևս մեկ անգամ խայտառակվեց. Արսեն Բաբայան

ԱԺ աշխատակազմի ղեկավարի նախկին տեղակալ Արսեն Բաբայանն իր ֆեյսբուքյան էջում գրել է․

«Մամուլից տեղեկացա, որ վարչապետ Փաշինյանի միջնեկ դուստրը դատական հայց է ներկայացրել ընդդեմ Նարեկ Սամսոնյանի՝ պահանջելով հերքել զրպարտությունը եւ փոխհատուցել կրած բարոյական վնասները։

Իմ համոզմամբ հենց սա է իրավական ճիշտ ճանապարհը, որ կարող էր արվել։ Իսկ ՀՔԾ-ի արածը, քրեական հետապնդումը Նարեկ Սամսոնյանի դեմ, խայտառակ ապօրինություն է։

Սուտ մատնություն կատարելու առթիվ Նարեկ Սամսոնյանին մեղադրանք առաջադրելը քրեական իրավունքի տեսանկյունից զավեշտալի է բազմաթիվ պատճառներով։ Դրանցից մեկի մասին ավելի վաղ խոսել էի, դա այն է, որ սուտ մատնություն կատարելու համար պարտադիր պայման է, որպեսզի հանցավոր արարք կատարողը հստակ գիտակցի, որ իր հայտնածը տեղի չի ունեցե, նա միանշանակ գիտակցել է, որ չի եղել այդպիսի բան եւ գիտակցաբար կատարել է սուտ մատնություն։ Ընդ որում, թեկուզ եւ հայտնված դեպքն իրականում տեղի ունեցած չլինի եւ Նարեկ Սամսոնյանն էլ հաստատապես համոզվի, որ դա տեղի չի ունեցել, միեւնույնն է անհնար է մեղադրանք առաջադրել Սամսոնյանին, քանի որ իր կողմից այդ մասին հրապարակելիս ինքը հավատացել է դրան։ Իրեն որեւէ մեկն այդ մասին պատմել է, հայտնել է, եւ ինքը վստահ է եղել, որ դա եղել է։ Հակառակն ապացուցելն անհնար է, որը հենց ՀՔԾ-ի պարտականությունն է։