«Անպատասխանատվությունն էլ ո՞նց ա լինում». համացանցում քննարկում են Փաշինյանի ինքնամեկուսացումը
Բլոգոսֆերա
ՀՀ վարչապետ Նիկոլ Փաշինյանն ուղիղ եթերում հայտարարեց, որ կնոջ՝ Աննա Փաշինյանի հետ ինքնամեկուսացվել են Սևանի թերակղզում գտնվող կառավարական ամառանոցներում՝ պայմանավորված այն հանգամանքով, որ Բրազիլիայի նախագահի մոտ կորոնավիրուս է կասկածվում, և, համաձայն լրատվամիջոցների տվյալների, թեստի արդյունքը դրական է եղել, իսկ Աննա Հակոբյանը վերջերս է վերադարձել Բրազիլիայից, որտեղ հանդիպել ու ողջագուրվել է նախագահի կնոջ հետ:
Այս հայտարարությունից հետո համացանցում ակտիվորեն քննարկվում է Փաշինյանի և Աննա Հակոբյանի մեկուսացումը Սևանի թերակղզում:
«Ռազմինֆո» մասնագիտացված կայքի համակարգող Կարեն Վրթանեսյանն իր էջում գրել է.
«Ո՞վ ինձ կբացատրի, թե ինչու է Նիկոլն ընտանիքով փախել Երևանից և «ինքնամեկուսացվել»։ Երեկ չէ՞ր ասում, թե «սովորական գրիպի նման բան ա»։
Եթե կորոնավիրուս ունի, թո՛ղ հայտարարեն, իսկ մեկուսացումը կարելի է նաև Երևանում կազմակերպել, կամ, թեկուզ, իր շատ սիրած «Գոլդեն փելեսում»։
Եթե չունի, ապա ինչո՞ւ է փախել Երևանից։
Ո՞ւր է Երևանի քաղաքապետը, որն այսօր պիտի «առաջին գծում» լիներ, պլանավորելով ու պատրաստվելով Երևանում արտակարգ քայլերի իրագործման»։
ԱԺ «Լուսավոր Հայաստան» խմբակցության պատգամավոր Գևորգ Գորգիսյանն իր ֆեյսբուքյան էջում գրում է.«Մենք ասում էինք փակեք սահմանը, նրանք ասում էին վտանգ չկա, գրիպից ավելի շատ մարդ է մահանում։
Մենք ասում էինք վտանգավոր գոտիներից եկածներին մեկուսացնել է պետք, նրանք ասում էին դա լավագույն լուծումը չի։
Մենք ասում էինք խուսափեք մարդաշատ վայրերից, նրանք հանրահավաք էին անում։
Հիմա գնացել Սևանի ամառանոցում ինքնամեկուսացել են, դե թող ժողովուրդն ու բժիշկները ոնց ուզում են տակից դուրս գան։
Անպատասխանատվությունը էլ ո՞նց ա լինում։
Ակամա հիշում ես վարչապետի սիրած գիրքը»։
«ՎԵՏՕ» շարժման ղեկավար Նարեկ Մալյանը սոցցանցի իր էջում հրապարակել է երկու լուսանկար, որոնցից մեկում Չինաստանի նախագահն է, մյուսում՝ Նիկոլ Փաշինյանը:
«Առաջին լուսանկարում Չինաստանի նախագահը քայլում է իր հայրենիքի, իր պետության վերջին օրերին ամենատառապած ու վարակված Ուհանի փողոցներով...
Մյուս լուսանկարում «Այո»-ի շտաբի քարոզիչն ա... թռել ա Սևանի թերակղզի, այնտեղ ապահով լայվ ա մտել ու ամոթանք ա տալիս, մեղադրում կորոնովիրուսով վարակված իր հայրենակցին»,-լուսանկարին կից գրել է Մալյանը:
Ադրբեջանագետ Անժելա Էլիբեգովան ուշադրություն է հրավիրել այն հանգամանքի վրա, որ երկրում արտակարգ դրություն չի հայտարարվում:
«Վարչապետը ընտանիքով մեկուսացավ Սևանում։ Արտակարգ դրություն չի հայտարարվում, չնայած արդեն պարզ ա, որ հանրաքվեն հետաձգվելու ա, 3 շաբաթ ա մնացել ու պարզ ա, որ ոչ-մի գիտակից մարդ չի գնա ընտրատարածք։ Չնայած, էդ ես հիմա տրամաբանորեն եմ դատում, իսկ դա էդքան էլ տեղին չի մեր վարքագծային մոդելի մեջ»,-գրել է նա։
Փաստաբան Նորայր Նորիկյանը գրել է. «Նկատի ունենալով, որ ակտիվորեն քննարկվում է երկրում արտակարգ դրություն հայտարարելու մասին հնարավորությունը, հարկ եմ համարում արձանագրել հետևյալը.
ՀՀ սահմանադրության 120-րդ հոդվածի համաձայն՝
1. Սահմանադրական կարգին սպառնացող անմիջական վտանգի դեպքում Կառավարությունը հայտարարում է արտակարգ դրություն, ձեռնարկում է իրավիճակից բխող միջոցառումներ և այդ մասին ուղերձով դիմում է ժողովրդին:
2. Արտակարգ դրություն հայտարարվելու դեպքում իրավունքի ուժով անհապաղ գումարվում է Ազգային ժողովի հատուկ նիստ:
3. Ազգային ժողովը կարող է պատգամավորների ընդհանուր թվի ձայների մեծամասնությամբ վերացնել արտակարգ դրությունը կամ չեղյալ հայտարարել արտակարգ դրության իրավական ռեժիմով նախատեսված միջոցառումների իրականացումը:
՛՛Արտակարգ դրության իրավական ռեժիմի մասին՛՛ ՀՀ օրենքի 1-ին հոդվածի համաձայն՝
1. Արտակարգ դրությունը Հայաստանի Հանրապետության ամբողջ տարածքում կամ դրա առանձին տարածքներում հայտարարվող պետական կառավարման և տեղական ինքնակառավարման մարմինների, ինչպես նաև նրանց պաշտոնատար անձանց գործունեության իրավական հատուկ ռեժիմ է։
2. Արտակարգ դրությունը հայտարարվում է միայն Հայաստանի Հանրապետության սահմանադրական կարգին անմիջական վտանգ սպառնալու դեպքում, ներառյալ` Հայաստանի Հանրապետության սահմանադրական կարգը բռնությամբ փոփոխելու կամ տապալելու, իշխանությունը զավթելու փորձերը, զինված խռովությունները, զանգվածային անկարգությունները, բռնի գործողություններով ուղեկցվող ազգային, ռասայական, կրոնական հակամարտությունները, ահաբեկչական ակտերը, հատուկ նշանակության օբյեկտների գրավումը կամ շրջափակումը, անօրինական զինված միավորումների ստեղծումը և գործունեությունը, արտակարգ իրավիճակները:
3. Արտակարգ դրությունը հայտարարվում է միայն այն դեպքերում, երբ Հայաստանի Հանրապետության սահմանադրական կարգին սպառնացող անմիջական վտանգի վերացումն առանց դրա անհնարին է:
Վերը նշված իրավական նորմերի համակողմանի վերլուծությունից հետևում է, որ արտակարգ դրություն կառավարության կողմից կարող է հայտարարվել միայն վերը նշված պայմանների առակյությանն դեպքում, ուստի անհրաժեշտ եմ համարում ընդգծել, որ կորոնավիրուսի պատճառով մեր երկրում որևէ կերպ արտակարգ դրություն հնարավոր չէ հայտարարել:
Ուստի, հանրաքվեի հետաձգումը կամ չեղարկումը չի կարող իրականացվել արտակարգ դրության հայտարարելու միջոցով:
Հանրաքվեի չեղարկման կամ հետաձգման, կամ հարցի լուծման հնարավոր այլ տարբերակի մասին անհրաժեշտության դեպքում կանդրադառնամ ավելի ուշ»:
ՈՒՂԻՂ ԵԹԵՐ
Ամենադիտված 
Դիրքում բռնшբшրnւթյшն դեպքը տեսած, ապա սպшնված 3 զինվորների ծնողներն արդարադատություն են պահանջում (տեսանյութ)
