Կոչ եմ անում ԱԱԾ-ին դիտել արտադրամասի աշխատակիցներին վարակած իտալացու արարքը որպես հնարավոր դիվերսիա. Արմեն Այվազյան

«Արարատ» ռազմավարագիտական կենտրոնի տնօրեն, պատմաբան և քաղաքագիտության դոկտոր Արմեն Այվազյանն իր ֆեյսբուքյան էջում գրել է․

«Կոչ եմ անում ՀՀ ԱԱԾ-ին դիտել Շենգավիթում գտնվող արտադրամասի աշխատակիցներին վարակած իտալացու արարքը որպես հնարավոր դիվերսիա։ Միանգամայն հավանական է, որ այս «մասնագետը» կատարել է թուրքական կամ ադրբեջանական հետախուզության առաջադրանքը՝ վարակել Հայաստանում հնարավորին չափ մեծ թվով մարդկանց։ Հնարավոր է, նա վաղուց ի վեր հավաքագրվել է կամ հե՛նց վերջին օրերին է (կլորիկ վարձատրության դիմաց) դարձել թուրքերի կամ ադրբեջանցիների վճարովի գործակալը։ Առաջարկում եմ ուշադիր քննել այդ անձի Հայաստանում վարած ամբողջ գործունեությունը ու մասնավորապես նրա վերջին այցի ժամանակ դրսևորած վարքը՝ քայլ առ քայլ։ Կարծում եմ, բավարար չափով փաստեր հավաքելուց հետո նրան կարելի կլինի մեղադրանք ներկայացնել ՀՀ քրեական օրենսգրքի № 303 հոդվածով («Դիվերսիա։»)։

Մեջբերում եմ ՀՀ քրեական օրենսգրքի Հոդված 303-ի բովանդակությունը՝ մեծատառերով ընդգծելով այս դեպքին համապատասխանող հատվածները.

Հոդված 303. «Դիվերսիան Պետությունը թուլացնելու նպատակով պայթյուններ, հրկիզումներ կամ այլ գործողություններ կատարելը՝ ուղղված ՄԱՐԴԿԱՆՑ ԶԱՆԳՎԱԾԱՅԻՆ ՈՉՆՉԱՑՄԱՆԸ, ՆՐԱՆՑ ԱՌՈՂՋՈՒԹՅԱՆԸ ՎՆԱՍ ՊԱՏՃԱՌԵԼՈՒՆ, կազմակերպությունների, կառույցների, հաղորդակցության ճանապարհների կամ միջոցների, կապի միջոցների կամ այլ գույքի ավերմանը կամ վնասմանը, կամ ԶԱՆԳՎԱԾԱՅԻՆ ԹՈՒՆԱՎՈՐՈՒՄՆԵՐԻՆ ԿԱՄ ՀԱՄԱՃԱՐԱԿՆԵՐԻ ԿԱՄ ԱՆԱՍՆԱՀԱՄԱՃԱՐԱԿՆԵՐԻ ՏԱՐԱԾՄԱՆԸ՝ պատժվում է ազատազրկմամբ՝ տասից տասնհինգ տարի ժամկետով»:

Այս դեպքին ՀՀ վարչապետի տված հետևյալ նկարագրությունը ունի դիվերսիայի հստակ հատկանիշներ.

«Իտալացի գործընկերը, ինստրուկտորը, որը պետք է ժամաներ, ժամանել է, ընդ որում առողջապահության նախարարության հսկողության տակ է եղել, բայց ցավոք սրտի էլի ջերմիջեցնող դեղեր խմելու միջոցով թաքցրել է իր իրական վիճակը եւ դրա արդյունքում 1-2 օր անցկացրել է արտադրամասում եւ որից հետո հեռացել է Հայաստանից` թողնելով այդպիսի հետեւանք իր հետեւից», -- https://news.am/arm/news/566850.html։

Առաջարկում եմ նաև ապագայում, հատկապես այսպիսի արտակարգ իրավիճակներում ՀՀ պատկան մարմինների կողմից խիստ վերահսկողություն սահմանել նմանատիպ «ինստրուկտորների» և «գործընկերների» Հայաստան ելումուտի և այստեղ նրանց ծավալած գործունեության նկատմամբ։ Որքան էլ դա կարող է դժվարություններ հարուցել, այդուհանդերձ՝ նրանց հասցրած հնարավոր վնասներից անհամեմատ ավելի էժան կնստի մեզ վրա»։