ՔԿ-ից՝ ԱԱԾ․ Հայկ Գրիգորյանը կառույցը սարքել է իր «դուքյանը»

Կառավարությունում այսօր հերթական «ազատում-նշանակում» օպերացիան տեղի ունեցավ։ Վարչապետի հրամանով, երեկ նշանակված ՀՀ քննչական կոմիտեի նախագահի տեղակալ Արմեն Աբազյանն ազատվեց պաշտոնից և նախագահի մեկ այլ հրամանով նշանակվեց Ազգային անվտանգության ծառայության (ԱԱԾ) տնօրենի տեղակալ: 

Քննչական կոմիտեն, այսպես ասած, դարձել է կոչում ստանալու վայր․ սկզբում զբաղեցնում են տեղակալի պաշտոնը, ստանում սպայական կոչում, այնուհետև տեղափոխվում ԱԱԾ՝ ինչ-որ ախորժելի պաշտոնի։ Փաստորեն, եթե նախկինում բարձր կոչումներ ստանալու համար տարիներ էին հարկավոր, ապա այժմ կարելի է մտնել ՔԿ և մեկ օրում այնտեղից դուրս գալ վաստակաշատ անցյալով։ 

Ի դեպ, սա առաջին դեպքը չէ ՔԿ նախագահ Հայկ Գրիգորյանի ղեկավարության ժամանակ, երբ որևէ անձի նշանակում են մասնավորապես տեղակալ, ապա ազատում և նշանակում ԱԱԾ-ում ինչ-որ պաշտոնի։ Հիշենք՝ նույն ջանքերով Արգիշտի Քյարամյանին ԱԱԾ տնօրենի պաշտոնին հասցնելու դեպքը, երբ մեկ օրում նշանակվեց ՔԿ-ի տեղակալ, այնուհետև ԱԱԾ տնօրենի տեղակալ, ապա՝ ԱԱԾ տնօրեն։   Ինչպես ասում են՝ Հայկ Գրիգորյանը կառույցը սարքել է իր «դուքյանը»։

Հիշեցնենք, որ Արմեն Աբազյանը օգոստոսի 10-ին, վարչապետ Նիկոլ Փաշինյանի որոշմամբ, նշանակվել է քննչական կոմիտեի նախագահի տեղակալ, իսկ օգոստոսի 11-ին ազատվել էր պաշտոնից: Այսօր արդեն Հանրապետության նախագահ Արմեն Սարգսյանի հրամանագրով՝ Արմեն Աբազյանը նշանակվել է Ազգային անվտանգության ծառայության տնօրենի տեղակալ: