Ենթադրում եմ՝ թոշակ չեն նշանակել, որոշել է վրեժխնդիր լինել. Ամատունի Վիրաբյան

Այսօր տեղեկություն  տարածվեց, որ Ռուսաստանում բնակվող ՀՀ քաղաքացի Արմեն Գրիգորյանը դիմել է ՀՀ գլխավոր դատախազությանը և հայտնել, որ իր թոշակի և աշխատանքային ստաժի հարցով դիմել է Հայաստանի ազգային արխիվի տնօրեն Ամատունի Վիրաբյանին և վերջինս իրենից իր աշխատանքային գործունեության մասին տեղեկություններ տրամադրելու համար գումար է պահանջել։ ԼՈՒՐԵՐ․com-ի հետ զրույցում Ամատունի Վիրաբյանն իր դեմ հանցագործության մասին հաղորդում ներկայացնելը զրպարտություն համարեց՝ նշելով, որ այդ մասին ինքն էլ է այսօր իմացել։

«Դա զրպարտանք է, այդպիսի բան չի եղել։ Ես այդ մարդու վերաբերյալ տվել եմ 2 բացասական տեղեկանք Ռուսաստանի համապատասխան մարմինների հարցման հիման վրա։ Ես պաշտոնական 2 հատ տեղեկանք եմ ՌԴ ուղարկել, որ իր մասին փաստաթուղթ չկա և չենք կարող տրամադրել. մեկը ուղարկել եմ հուլիս ամսին, մյուսը՝ դեկտեմբերին։ Ենթադրում եմ՝ նրան թոշակ չեն նշանակել և նա որոշել է վրեժխնդիր լինել՝ համարելով, որ ես եմ իր դժբախտության պատճառը։ Փաստաբաններս պատրաստվում են սուտ մատնություն տալու վերաբերյալ հայցադիմում պատրաստել և ուղարկել իրավապահ մարմիններին»,- նշեց նա։ 

Նա նշեց, որ գործը ոստիկանությունում է, նյութեր են նախապատրաստվում և այսօր գնալու է դրանց ծանոթանալու։

Նշենք, որ Հայաստանի ազգային արխիվի տնօրեն Ամատունի Վիրաբյանի մասով ՀՀ գլխավոր դատախազություն հանցագործության մասին հաղորդում է ներկայացվել, որն ավելի ուշ ուղարկվել է ոստիկանության Արաբկիրի բաժին՝ հետաքննություն իրականացնելու համար: