Դատարանը մասնակի բավարարեց Թեհմինե Ենոքյանի հայցն ընդդեմ «Լիդիան Արմենիայի» աշխատակցի

Թեհմինե Ենոքյանի բողոքի հիման վրա քրեական գործ էր հարուցվել: Գործի քննությամբ պարզվել էր, որ զրպարտող լուսանկարներ հրապարակած «Vahagn Hovhannisyan» օգտատերի էջը վարում է «Լիդիան Արմենիա»-ի աշխատակից Հովսեփ Ասոյանը: Ի սկզբանե ՀՀ քննչական կոմիտեն կարճել էր գործը հանցակազմի բացակայության պատճառով: Ըստ կոմիտեի` Թեհմինե Ենոքյանը հասարակական գործունեություն է ծավալել և «Տեղեկատվության ազատության մասին» ՀՀ օրենքի դրույթները կիրառելի են այդ լուսանկարների հրապարակման առնչությամբ: Թեհմինե Ենոքյանը, սակայն, բողոքարկել էր կարճման մասին որոշումը ՀՀ գլխավոր դատախազություն: 2019 թ. ապրիլի 29-ին էլ հայցադիմում էր ներկայացրել Երևան քաղաքի ընդհանուր իրավասության դատարան ընդդեմ Հովսեփ Ասոյանի՝ վիրավորանք համարվող տեղեկությունները հերքելուն պարտավորեցնելու և 1 միլիոն դրամ փոխհատուցում տրամադրելու պահանջների մասին: Դատարանը մասնակիորեն էր բավարարել հայցադիմումի պահանջը՝ 1 միլիոնի փոխարեն պարտավորեցնելով Հովսեփ Ասոյանին վճարել 200 հազար դրամ: