Ձեւական պրոցես է անցկացվում. Գագիկ Խաչատրյանի պաշտպան

«Երեկվանից փորձում էի վերլուծել երեկվա դատական նիստը, հասկանալով, թե արդյոք հնարավո՞ր է արդար դատական ակտ կայացվի, սակայն ակնհայտ դաձավ, որ ոչ։ Եթե միշտ ասում ենք՝ ծանոթանանք դատական ակտին, տեսնենք՝ ինչ է գրել, որ բողոքարկենք, այս պահին նույնիսկ դրա կարիքը չկա ասելու, որովետեւ պրոցեսը ցույց տվեց, որ ակնհայտ է, որ դատարանը գործի նյութերին ընդհանրապես ծանոթ չէր։ Այսինքն՝ ֆիզիկապես հնարավորություն չուներ այս կարճ ժամանակում ծանոթանալու գործի նյութերին»,- այս մասին այսօր դատական նիստից հետո ասաց ՀՀ ֆինանսների նախկին նախարար Գագիկ Խաչատրյանի փաստաբան Երեմ Սարգսյանը։ 

Նրա խոսքով՝ իրավական առումով, միանշանակ, իր պաշտպանյալի խափանման միջոցը պետք է փոխվեր. «Հիմա դատավորը ինչպե՞ս է որոշելու՝ հիմքեր կա՞ն, թե՞ ոչ։ Միակ եղանակը պետք է լիներ՝ գործի նյութերին ծանոթ լինելը։ Սակայն սա նշանակում է, որ ծանոթացել է այնքանով, որքանով հնարավոր է եղել։ Անկհայտ էր, որ սա որոշված էր։ Անկախ գործի բնույթից, հանգամանքներից, թե ինչ է քննարկվելու, ով ինչ է ասելու, նպատակը ձեւական պրոցես անցկացնելն էր, որից հետո դատարանն այդ որոշումը պատրաստ պետք է հրապարակեր»,- նշեց նա։ 

Փաստաբանը նշեց, որ Գագիկ Խաչատրյանի խափանման միջոցը չփոփոխելու դատարանի որոշումը պաշտպանական թիմը բողոքարկելու է։

Նշենք, որ քիչ առաջ Երեւան քաղաքի ընդհանուր իրավասության դատարանը մերժեց Գագիկ Խաչատրյանին կալանքից ազատելու վերաբերյալ պաշտպանների միջնորդությունը։

Նշենք, որ պաշտպանական կողմը դատարանին միջնորդել էր Գագիկ Խաչատրյանին ազատ արձակել կամ առնվազն գրավ կիրառել։ Պաշտպանները պնդում էին, որ Խաչատրյանին կալանքի տակ պահելու որեւէ հիմք չկա, գործից թաքնվելու կամ խոչընդոտելու ռիսկ նույնպես չկա։ Նրանք մատնանշել էին նաեւ Խաչատրյանի առողջական խնդիրները, պնդելով, որ իրենց պաշտպանյալի առողջական խնդիրները կալանքի հետ անհամատեղելի են։

Հիշեցնենք, որ Գագիկ Խաչատրյանը եւ Կարեն Խաչատրյանը մեղադրվում են  պետական գործունեության ընթացքում թույլ տված ենթադրյալ պաշտոնեական դիրքի չարաշահման, գույքի վատնման եւ պաշտոնեական կեղծիքի համար։ Երկուսն էլ չեն ընդունում իրենց առաջադրված մեղադրանքը։