Վահրամ Ավետիսյանը ՍԴ դատավորի՝ իմ թեկնածուն չի եղել․ Ռուստամ Բադասյան

Վահրամ Ավետիսյանը ՍԴ դատավորի իմ թեկնածուն չի եղել, կառավարության թեկնածուն է եղել: Այս մասին, այսօր՝ օգոստոսի 31-ին, ԱԺ-ում լրագրողների հետ զրույցում նշեց արդարադատության նախարար Ռուստամ Բադասյանը՝ անդրադառնալով մամուլի տեղեկություններին, որ Վահրամ Ավետիսյանի թեկնածությունն իր առաջարկով էր ներկայացվել, սակայն վերջինս ավելի ուշ հրաժարվեց ՍԴ դատավորի թեկնածությունից:

«Ինչու ենք կենտրոնացել նրա վրա: Եղել էր կառավարության կողմից առաջադրված թեկնածություն, քննարկումների արդյունքում առաջացել էր իրավիճակ, որից ելքը գտնվեց: Պարոն Ավետիսյանը հրաժարվեց հետագա պրոցեսին մասնակցելուց»,-ասաց Բադասյանը:

Բադասյանն, անդրադառնալով կառավարության կողմից առաջադրված թեկնածուին, ասաց. «Պարոն Շաթիրյանն էլ կարծում եմ՝ շատ դրական թեկնածու է, եւ ՍԴ դատավորի բարձր կոչմանն արժանի մասնագետ է եւ անձնավորություն»:

Դիտարկմանը, որ Շաթիրյանը ԱԺ-ի կողմից ընտրվել էր Կոռուպցիայի կանխարգելման հանձնաժողովի անդամ, բայց քանի որ այդ կառույցի ղեկավար չդարձավ, նեղացավ ու հրաժարվեց անդամությունից, արդարադատության նախարարն արձագանքեց. «Դա ցավալի միջադեպ էր: Կարծում եմ՝ ժամանակ կունենան «Իմ քայլը» խմբակցության հետ պարզաբանելու այդ հարցը»:

Հարցին, թե արդյոք ՍԴ դատավորի երեք թեկնածուներն այն անձինք են, որոնք եթե ԱԺ կողմից ընտրվեն ՍԴ դատավորներ, փոխելու են ՍԴ-ի ներսում տիրող իրավիճակը, ընդհանրապես մեծանալու է հանրության մոտ վստահությունը ՍԴ-ի նկատմամբ, Բադասյանը պատասխանեց. «Ես միայն կառավարության թեկնածուի մասով թույլ կտամ կարծիք արտահայտել: Կարծում եմ՝ այո, պարոն Շաթիրյանի թե մասնագիտական, թե անձնային հատկանիշները բավարարում է ՍԴ-ում գործունեության համար եւ ՍԴ-ի նկատմամբ վստահություն սերմանելու հարցում: Մյուս թեկնածուների մասով թույլ չեմ տա որեւէ կարծիք արտահայտել, որովհետեւ նրանք ՀՀ նախագահի եւ Դատավորների ընդհանուր ժողովի կողմից առաջադրված թեկնածուներ են»:

Այն հարցին, թե Գերագույն դատարանի կազմը ըստ նրա ինչպիսին պետք է լինի, Բադասյանը պատասխանեց․ «Ընթացակարգը, որով պետք է ձևավորվի Գերագույն դատարանը, սահմանադրական  բարեփոխումների հանձնաժողովը դեռևս չի քննարկել։ Կարծում եմ՝ պետք է այնպիսի մեխանիզմ լինի, որը հանրային վստահությունը նոր ստեղծվող դատարանի նկատմամբ շեշտակի կբարձրացնի»։