Ուղղակի բառեր չէին, երբ ասում էինք՝ մենք պայքարելու ենք քրեական ենթամշակույթի դեմ․ Բադասյան

Քրեակատարողական հիմնարկներում տարիներ շարունակ խոշտանգման դեպքերը կապված են եղել քրեական ենթամշակույթի հետ և կարող ենք արձանագրել, որ ուղղակի բառեր չէին, երբ ասում էինք՝ մենք պայքարելու ենք քրեական ենթամշակույթի դեմ։ Այս մասին այսօր լրագրողների հետ զրույցում ասաց Արդարադատության նախարար Ռուստամ Բադասյանն՝ անդրադառնալով այնդիտարկմանը, որ քրեակատարողական հիմնարկներում խոշտանգման դեպքերը չեն դադարում և հեղափոխությունից հետո դեռևս չի հաջողվել լրջագույն փոփոխություններ իրականացնել ՔԿՀ-ում։ 

«Եթե վստահելու ենք ոչ թե Արդարադատության նախարարության կամ քրեակատարողական ծառայության տեղեկատվությանը, այլ քրեական ենթամշակույթի կողմից տարվող տարածվող լուրերին, ըստ որի՝ խոշտանգումներ են տեղի ունենում քրեակատարողական հիմնարկներում, կարծում եմ՝ սխալ մոտեցում է։ Քրեական ենթամշակույթի դեմ պայքարը ընթանում է և ընթանալու է։ Վերջին հարուցված քրեական գործերին դուք ծանոթ եք եւ բնականաբար, որոշ դեպքերում այդ գործերի կամ դրանցից  դուրս խցերում կատարված խուզարկությունները կարող են որոշակի դիմադրության արժանանալ: Այդ դիմադրությունը հաղթահարելու օրենքով սահմանված մեխանիզմ կա, խոշտանգման մասին խոսելը ավելորդ է: Խոշտանգումները կապված են եղել քրեական ենթամշակույթի, այդ ենթամշակույթի ազդեցության, այդ թվում ՔԿԾ-ի վրա ազդեցության հետեւանքով: Հիմա մենք զբաղված ենք այդ հետեւանքը ծնող պատճառների վերացմամբ»,-ասաց Բադասյանը։ 

Հարցին, թե «օրենքով գողերի» ձերբակալումը հենց իր ասածի հետևա՞նքն է, Բադասյանը պատասխանեց․

«Մենք կարող ենք արձանագրել, որ քրեական ենթամշակույթի օրենքի քննարկման ընթացքում հնչած այն կարծիքները, որ սա հաստատ չի գործելու, արդեն ջախջախված են։ Ինչ վերաբերում է ամբողջական օրենքի կիրառելիության ընթացքում առաջացող բարդություններին, ապա այդ մասին կարող ենք խոսել, երբ մեղադրական դատավճիռ լինի, երբ վճռաբեկ դատարանը կարող է իրավական դիրքորոշում արտահայտել, բայց ես որևէ մտահոգություն չունեմ կիրառելիության հետ կապված»։