Որեւէ խնդիր չեմ տեսնում․ Արևիկ Պետրոսյանը՝ ՍԴ նախագահի միայն մեկ թեկնածուի առաջադրման մասին

Դեռ քննարկումներն ավարտված չեն, ընթացքի մեջ են. իսկ գնահատականները, թե ինչ որակի կլինի, ինչ վստահություն կունենա գնահատողները հանրությունն է, ՍԴ դիմող սուբյեկտներն են: Այս մասին, այսօր՝ սեպտեմբերի 25-ին, ՍԴ-ի դիմաց լրագրողների հետ զրույցում նշեց ՍԴ դատավոր Արեւիկ Պետրոսյանը:

«Եթե քննարկումները բազմակողմանի են, դրանք օբյեկտիվ են, խնդիրը լուծելուն են ուղղված, պետք է դրանք նորմալ ընդունել: ՍԴ-ն քաղաքական մարմին չէ եւ պետք է բացառվի այստեղ բազմաբեւեռությունը: Դա հակասահմանադրական իրավիճակ կլինի: Ցանկացած քաղաքական մարմնում կարող են լինել տարբեր ուժեր, հոսանքներ, բայց ՍԴ-ն քաղաքական մարմին չէ, դա անթույլատրելի է»,-ասաց նա:

Դիտարկմանը, որ Հրայր Թովմասյանը հայտարարել էր, որ տպավորություն ունի, որ ամեն ինչ արդեն որոշված է, Արեւիկ Պետրոսյանն ասաց, որ ինքը քննարկումների մասնակցում է, պատրաստել է հարցեր, կլսի պատասխանները, ելույթ կունենա, որից հետո իր ընտրությունը կկատարի:

Հարցին, թե խնդրահարույց չէ՞, որ ՍԴ նախագահի միայն մեկ թեկնածու է առաջադրված, Արեւիկ Պետրոսյանն ասաց. «Սա փաստ է, իրողություն: Որեւէ խնդիր ես չեմ տեսնում: Կարող է ընդհանրապես այս փուլում թեկնածու չլինել, կարող էին լինել մի քանիսը:

Ենթադրվում է, որ եթե առաջադրումները կատարվել են եւ թեկնածու կա, նշանակում է արդեն հաջորդ գործընթացներն են գալիս: Այս փուլում չեմ կարծում, որ կլինեն առաջադրումներ, իսկ եթե լինեն, խիստ բացառող հանգամանք գոյություն չունի, բայց տրամաբանությունը չեմ տեսնում»: