Ծովագյուղի ծեծկռտուքի գործով կա ձերբակալված

Սեպտեմբերի 24-ին Ծովագյուղում տեղի ունեցած ծեծկռտուքի գործով կա մեկ ձերբակալված անձ: Այս մասին ԼՈՒՐԵՐ.com-ին հայտնեցին ՀՀ Քննչական կոմիտեից:

Հարցին՝ արդյոք ձերբակալված անձը Ծովագյուղ համայնքի ղեկավարն է, ՔԿ-ից բացասական պատասխան տվեցին:

Քննչական կոմիտեից այլ մանրամասներ չհայտնեցին:

Ավելի վաղ հայտնել էինք, որ սեպտեմբերի 24-ին, Ծովագյուղում համայնքի ղեկավար Վահրամ Գևորգյանի գլխավորությամբ, 40-ից ավելի գյուղացիներ հարձակվել են «Գազպրոմ Արմենիա» Գեղարքունիքի մարզային վարչության աշխատակիցերի վրա և ծեծի ենթարկել նրանց։ Ըստ նախնական տեղեկությունների՝ գյուղապետն ու գյուղացիները ծեծել են նաև հասարակական կարգը պահպանելու համար դեպքի վայրում գտնվող ոստիկաններին՝ հասցնելով մարմնական տարբեր վնասվածներ:  Տուժածների թվում են նաև Գավառի ոստիկանապետ Իգոր Մեսրոպյանն ու Սևանի ոստիկանապետ Սարիբեկ Ռուստամյանը։

Մամուլում տարածված տեղեկություններով՝ միջադեպի պատճառը  «Գազպրոմ»-ում ստացված տեղեկություններն են այն մասին, որ գյուղում երկար տարիներ կատարվել է գազագողություն։

Դեպքի առթիվ ՀՀ քննչական կոմիտեի Գեղարքունիքի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 258-րդ հոդվածի (խուլիգանություն) 3-րդ մասի 1-ին եւ 2-րդ կետերով եւ 316-րդ հոդվածի (իշխանության ներկայացուցչի նկատմամբ բռնություն գործադրելը) 1-ին մասով: