Ն․ Մ․-ն ՀՀ ԶՈւ վերաբերյալ գաղտնիք պարունակող ինֆորմացիա է հավաքագրել ու փոխանցել

«ԱԱԾ-ի կողմից բացահայտվել է բարձրաստիճան նախկին զինվորականի կողմից հակառակորդի կողմից հավաքագրվելու դեպք, որի արդյունքում տվյալ բարձրաստիճան պաշտոնատար զինծառայողը ՀՀ-ում տարբեր զորամասերից հավաքագրել է տարաբնույթ, այդ թվում՝ նաև գաղտնիք պարունակող տեղեկություններ և փոխանցել հակառակորդին»,- այս մասին այսօր հրավիրված մամուլի ասուլիսին ասաց ԱԱԾ Քրեագիտական վարչության պետ Ռաֆայել Վարդանյանը՝ տեղեկացնելով վերջին մեկ ամսվա ընթացքում բացահայտած՝ պետական դավաճանության և լրտեսության դեպքերին։ 

Անդրադառնալով ՀՀ-ում օտարերկրյա քաղաքացիների կողմից իրականացրած գործողություններին ԱԱԾ Քրեագիտական վարչության պետը նշեց, որ օտարերկրյա քաղաքացիները ձեռք են բերել տվյալներ ՀՀ զորահավաքի, տեխնիկայի շարժի, այդ թվում նաև՝ այլ բնույթի տեղեկություններ։ Վարդանյանը նշեց՝ երկու դեպքերով էլ ԱԱԾ քննչական դեպարտամենտում հարուցվել են քրեական գործեր, որոնք գտնվում են նախաքննության փուլում:

Վարդանյանը որոշակի մանրամասներ հայտնեց նաև զինծառայողների շրջանում կեղծ տեղեկություն տարածելու դեպքի մասին․ «Ն.Մ.-ն 2020 թ սեպտեմբերի 27-ից Արցախում և Հայաստանում հայտարարված ռազմական դրության պայմաններում  մարտական հերթապահություն իրականացնող համածառայակիցների շրջանում տարածել է կեղծ և ստահոդ լուրեր ՀՀ իշխանությունների կողմից հողերը հանձնելու վերաբերյալ, ինչի կապակցությամբ տվյալ անձը ձերբակալվել է, որի նկատմամբ հետագայում խափանման միջոց է  ընտրվել կալանավորումը»,- ասաց Վարդանյանը:

Նա նաև նշեց, որ մեծածավալ աշխատանք են իրականացնում ՀՀ-ում գործող հսկիչ-անցակետերում․ ՊՆ-ի, Ոստիկանապետի և ԱԱԾ տնօրենի, ինչպես նաև Ռազմական ոստիկանության համատեղ հրամանների համաձայն՝ Արարատի, Գեղարքունիքի, Սյունիքի, Վայոց ձորի ավտոճանապարհների որոշ հատվածներում տեղադրել են 10-ից ավելի անցակետեր, որորնք շուրջօրյա աշխատանքներ են  իրականացնում: