Հայկ Սարգսյանի պաշտոնյա ընկերը ծեծել է քննիչին. վիճաբանություն` Սարալանջում

Երեկ Սարալանջի փողոցում տեղի է ունեցել վիճաբանություն, կա բերման ենթարկված: Այս մասին ԼՈՒՐԵՐ.com-ին հայտնեցին ոստիկանության լրատվականից:

«Դեկտեմբերի 15-ին, ժ. 23.50-ին քաղաքացուց հաղորդում է ստացվել, որ նույն օրը ժ. 22.05-ին Սարալանջ փողոցում մի քանի անձինք ճանապարհը չզիջելու և ձայնային ազդանշան տալու հարցի շուրջ վիճաբանել են իր հետ, որի ժամանակ հարվածել ենիր մարմնի տարբեր մասերին: Վիճաբանության կասկածանքով կա բերման ենթարկված անձ: Ձեռնարկվում են միջոցառումներ դեպքի հանգամանքները պարզելու ուղղությամբ: Նշանակվել է դատաբժշկական փորձաքննություն: Կատարվում է քննություն»,- փոխանցեցին ոստիկանությունից:

Ըստ hraparak.am-ի միջադեպը տեղի է ունեցել իմքայլական պատգամավոր Հայկ Սարգսյանի քրոջ ամուսնու՝ Արթուրի և Քննչական կոմիտեի քննիչներից մեկի միջև: Բանն այն է, որ վերջինս՝ ծեծի է ենթարկվել կնոջ և երեխաների ներկայությամբ: Ծեծի ենթարկողները եղել են մոտ 10 հոգի` 2 մեքենաներով, զինվորական համազգեստներով և զինված, ու ներկայացել են, թե իբր նոր են դիրքերից իջել: Ծեծի պատճառը եղել է այն, որ քննիչի մեքենան անսարք է եղել, և նա փորձել է ճանապարհի երթևեկելի գոտուց հեռացնել մեքենան, ինչն էլ «դուր չի եկել» ծեծի ենթարկող Արթուրին:

Աղբյուրի տեղեկացմամբ՝ ծեծի ենթարկված քննիչը Քննչական կոմիտեի ՀԿԳ քննիչՎ․Ա-ն է, իսկ ծեծի ենթարկողներից Արթուրը Սննդի անվտանգության տեսչական մարմնի` ՍԱՏՄ պետի տեղակալ Արթուր Շատվորյանն է, որը, ինչպես նշում է աղբյուրը, Հայկ Սարգսյանի քրոջ ամուսինն է։

ԼՈՒՐԵՐ.com-ը փորձեց մեկնաբանություն ստանալ նաև Քննչական կոմիտեից, սակայն այստեղից ոչինչ չասացին, միայն ուղղորդեցին տեղեկությունը ճշտել ոստիկանությունից:

ՍԱՏՄ-ից էլ hraparak.am-ին փոխանցել են, որ Արթուր Շատվորյանից իրենք տեղեկություն չունեն, այսօր նա աշխատանքի չի եկել, միայն գիտեն, որ Արթուր Շատվորյանն այս պահին գտնվում է «Պաշտպանության նախարարության իրավասության տակ՝ որպես կամավոր»։