«Դա մեծ շոուի մի դրվագ է»․ Hraparak.am

Քննչական կոմիտեն որոշել է ընդդիմության մեծ հանրահավաքից մեկ օր առաջ՝ փետրվարի 19-ին, մեղադրանք առաջադրել Երեւանի քաղաքապետ Տարոն Մարգարյանին, Պետգույքի կառավարման վարչության նախկին պետ Արման Սահակյանին՝ ԱԺ նախկին նախագահ Գալուստ Սահակյանի որդուն, եւ եւս երկու նախկին պաշտոնյայի։ Հարուցված քրգործի վերաբերյալ Քննչական կոմիտեի տարածած հաղորդագրությունից, սակայն, լավ չի հասկացվում՝ կոնկրետ ինչում են մեղադրվում նախկին քաղաքապետն ու մյուս պաշտոնյաները, միայն երեւում է, որ խոսքը 2009-11 թթ․ ինչ-որ հողերի օտարման մասին է, որտեղ, ըստ իշխանությունների, թույլ է տրվել պաշտոնեական լիազորությունների չարաշահում։

Տարոն Մարգարյանի շահերի պաշտպանն արդեն արձագանքել է այս մեղադրանքին՝ հայտնելով, որ քրեական գործը զավեշտալի է, նա չի ընդունում մեղադրանքը եւ հումորով է վերաբերվում դրան։
Մենք զրուցել ենք Պետգույքի կառավարման վարչության նախկին պետ Արման Սահակյանի հետ։ Նա ասաց, որ սա հերթական շինծու գործն է, եւ իր համար նույնպես ծիծաղելի է այս ամենը։ «Էն, ինչը ես պատկերացնում եմ, որ մասով որ ես անցնում եմ, դրա մասին չեմ կարող էս պահին խոսել, որովհետեւ դա նախաքննական գաղտնիք է, եւ պիտի ասեմ, որ վաղուց արդեն ինձ համար սովորություն եմ դարձրել, որ էս ոչմիբանների սարքած գործերին մեկնաբանություն չտամ։ Ինձ համար ուղղակի ծիծաղելի է այս ամենը։ Առավել եւս էն, ինչ որ պատկերացնում եմ, որով որ նորից իմ անունը շահարկվեց, շուտով կլրանա այդ գործի հոբելյանական 3 տարին։ Դրանք գործերի խումբ են։ Ինձ մեղադրանք առաջադրվել էր դեռեւս նախորդ տարի, ուղղակի ինձ համար անհասկանալի էր, թե ինչ կապ ուներ էդ հաղորդագրությունն ինձ հետ։ Եվ ես նույնպես ծիծաղով եմ վերաբերվում նմանատիպ շինծու գործեր պատվիրելուն, սարքելուն, կարելուն»,- ասաց Արման Սահակյանը։

- Հիմա քանի՞ քրեական գործ կա Ձեր դեմ հարուցված։

- Եկեք թիվը չասեմ, քանի որ դրանք բազմաթիվ են, բայց, իհարկե, կոնկրետ ես քրեական գործերով չեմ անցնում, համենայնդեպս, իմ ղեկավարած գերատեսչության հետ կապված գործերը բավականին շատ են, տասնյակներ են։ Բայց մեղադրանք առաջադրվել է այս մի գործով։

- Մի կողմ թողնենք քաղաքական մոտիվացիան, ըստ Ձեզ՝ այդ բազմաթիվ քրեական գործերից որեւէ մեկի տակ հիմք չկա՞, Ձեր աշխատած տարիները լիարժեք մաքո՞ւր են եղել, ու որեւէ չարաշահում չի՞ եղել։

- Իհարկե, չկա։ Ես շատ հանգիստ եմ տանում, հարուցվել են էդ գործերը, թող նայեն, ուսումնասիրեն, եթե ինչ-որ բան կա, թող գտնեն, ես շատ հանգիստ եմ։ Նորից եմ ասում՝ ես արդեն սովորել եմ էս ոչմիբանների սարքած գործերին։

- Մենք հաղորդագրության մեջ կարդում ենք, որ «նախկին քաղաքապետը, նպատակ ունենալով Երեւան քաղաքի որոշ դպրոցների կողմից զբաղեցրած հողատարածքներից իր եւ իր մերձավորների համար առանձնացնել եւ ձեռք բերել հողատարածքներ, իր պաշտոնեական դիրքը ծառայության շահերին հակառակ օգտագործելով, նախաձեռնել է դպրոցների զբաղեցրած հողամասերի սահմանները վերաճշտելու գործընթաց եւ հանձնարարել քաղաքապետարանի համապատասխան պաշտոնյաներին եւ աշխատակիցներին՝ թողարկել դպրոցների հողատարածքների նոր հատակագիծ»: Սրա վերաբերյալ ի՞նչ կասեք, այստեղ կա՞ չարաշահում։

- Ես կարծում եմ, որ որեւիցե չարաշահում չի կարող էդտեղ լինել, եւ Տարոն Մարգարյանի փաստաբանը բավականին հստակ էդ բոլոր շինծու մեղադրանքներին պատասխանները տվել էր իրավական հարթությունում։ Համենայնդեպս, ես կարծում եմ, որ ես որեւէ կապ չունեմ էդ ՊՈԱԿ-ների, ՀՈԱԿ-ների, չգիտեմ՝ ինչ է գրված էնտեղ, դրանց հետ, եւ ես վստահ եմ, որ էս ամեն ինչը, որ շահարկվում է թե՛ իմ, թե՛ Տարոն Մարգարյանի նկատմամբ, ունեն զուտ քաղաքական նկրտումներ։

- Վերադառնալով հաղորդագրությանը, մի փոքր անհասկանալի է՝ ինչո՞ւմ են Ձեզ մեղադրում, կոնկրետ ի՞նչ չարաշահում եք թույլ տվել։

- Անկեղծ ասած՝ ես էլ չեմ պատկերացնում։ Դա մեծ շոուի մի դրվագ է։

- Ձեզ կանչե՞լ են հարցաքննության։

- Այն, ինչ նկարագրված է Քննչական կոմիտեի կողմից, որեւիցե նմանատիպ գործով ես հարցաքննության չեմ հրավիրվել։ Իսկ այդ մեղադրանքը, ես ասացի արդեն, իմ պատկերացումներով՝ այդ գործի շրջանակներում կա եւս մի գործ, որի մասին էդտեղ նկարագրված չէ, եւ նախորդ տարի ինձ էդ մեղադրանքն արդեն առաջադրվել է։ Թե հիմա ինչու է նորից շահարկվում, կարծում եմ՝ բոլորիս համար էլ պարզ է։

- Քանի որ այսօր մեծ հանրահավաք է նախատեսված, ի՞նչ եք կարծում՝ հատո՞ւկ են հենց հանրահավաքից առաջ այս մեղադրանքն առաջադրել։

- Ոչ թե կարծում եմ, այլ հաստատ վստահ եմ դրանում։

- Հնարավո՞ր է, որ հանրահավաքից առաջ, օրինակ, որոշում կայացնեն Ձեզ ձերբակալել։

- Դե, կապրենք՝ կտեսնենք, չեմ կարծում։ Համենայնդեպս, ես մտածում եմ, որ մեր իրավապահ մարմինները, առավել եւս՝ Քննչական կոմիտեի, բավականին շատ քննիչների հետ եմ ծանոթացել, կարծում եմ՝ նորմալ մարդիկ են, ուղղակի իրենք էլ ստիպված փորձում են էդ հանձնարարությունները կատարել։

- Դուք եւ Տարոն Մարգարյանը ներկա լինելո՞ւ եք հանրահավաքին։

- Ոչ միայն ներկա եմ լինելու, այլեւ կոչ եմ անում բոլոր իմ հարազատներին, իմ ընկերներին, իմ մերձավորներին, ի վերջո, 2017 թվականին ես մոտ 20 հազար ձայն եմ հավաքել եւ թիվ 2 ընտրատարածքի բոլոր իմ ընտրողներին խնդրում եմ, կոչ եմ անում, հորդորում եմ, որպեսզի բոլորը մասնակցեն վաղվա հանրահավաքին՝ ի փրկություն մեր երկրի, էս ոչմիբաններից։