«Արտահերթ ընտրություններ» բառակապակցությունը օգտագործելով՝ Փաշինյանը կձգի-կձգի մինչև սեպտեմբեր-հոկտեմբեր-նոյեմբեր․ Վազգեն Մանուկյան

Իրական, նորմալ երկրում այս պայքարը պետք է ավարտվեր առաջին շաբաթում, որովհետև հանցագործությունը այնքան բացահայտ էր ու այնքան ապշեցուցիչ, որ մի շաբաթվա գործ էր մեր պետությունում։ Այն տևում է արդեն 4 ամիս և, ես կդժվարանամ ասել, թե դեռ ինչքան կարող է տևել, բայց մի բան հասկանալի է, որ այդ 4 ամսվա մեջ մենք բավականին բան կորցրեցինք։ Այս մասին, այսօր՝ մարտի 12-ին, Բաղրամյան պողոտայում լրագրողների հետ զրույցում նշեց «Հայրենիքի փրկության շարժման» վարչապետի թեկնածու Վազգեն Մանուկյանը։

«Ես համոզված չեմ, որ Նիկոլ Փաշինյանը ուզում է գնալ հիմա արտահերթ ընտրությունների, ինքը «արտահերթ ընտրություններ» բառակապակցությունը օգտագործելով և այդ խայծը օգտագործելով կձգի-կձգի մինչև սեպտեմբեր-հոկտեմբեր-նոյեմբեր․ դա իրեն հնարավորություն է տալիս ժողովրդին ցույց տալ, որ մի սրեք իրավիճակը, մի բորբոքվեք, որովհետև հեսա-հեսա հարցը լուծվում է։ Իրականում ես համարյա հավանական չեմ համարում, որ ինքը դրան գնա, իսկ եթե գնա՝ ես արդեն ասել եմ, որ  կտրականապես դեմ եմ ու համոզված եմ, որ չի լինի, եթե լինի՝ նոր կնստենք, կմտածենք»,-ասաց նա:

Անդրադառնալով իր դեմ հարուցված քրեական գործին՝ Վազգեն Մանուկյանն ասաց. «Սա պատերազմ է Հայաստանի ապագայի համար: Այսպիսի պատերազմի մեջ քրեական գործերը երկրորդական հարցեր են»: