Տեղումների ժամանակ տնտեսվարողները պարտավոր են մաքրել իրենց օբյեկտների հարակից տարածքները

«Տնտեսվարողների կողմից հարակից տարածքների պարտադիր բարեկարգման մասին պայմանագրերի կատարումը Երևանի ավագանու որոշումն է: Ուստի հետևողական աշխատանք պետք է տարվի պարտավորությունների կատարման մասով»,- Երևանի քաղաքապետ Տարոն Մարգարյանի հանձնարարականով աշխատանքային հերթական խորհրդակցության ընթացքում նշել է քաղաքապետի տեղակալ Կամո Արեյանը: Ընդգծվել է նաև, որ, հատկապես տեղումների ժամանակ, տնտեսվարողները պարտավոր են իրականացնել իրենց օբյեկտների հարակից տարածքների մաքրման աշխատանքները։

Անդրադառնալով մայրաքաղաքում տոնական զարդարման աշխատանքների ընթացքին' վարչական շրջանների ղեկավարներին ու առևտրի և սպասարկումների վարչությանը հանձնարարվել է հնարավորին կարճ ժամկետում ավարտել նշված աշխատանքները, ինչպես նաև ապահովել մայրաքաղաքի տոնական լուսավորությունը: Հանձնարարվել է նաև մայրաքաղաքի բոլոր կամուրջների, այգիների, պուրակների մերձակա հատվածներում, փողոցներում ու բակային տարածքներում կատարել մաքրման լայնածավալ աշխատանքներ: «Երևանն իր տոնական զարդարանքին համապատասխան մաքուր տեսք պետք է ունենա»,- նշել է Կամո Արեյանը:

Բազմաբնակարան շենքերի բակային տարածքներում և շքամուտքերում անօրինական առևտուրը կանխելու նպատակով վարչական շրջանների ղեկավարներին հանձնարարվել է համատիրությունների հետ համատեղ ակտիվ աշխատանք տանել: Զեկուցվել է, որ անցյալ շաբաթվա ընթաքում արձանագրված դեպքերի մասով կազմվել են վարչական արձանագրություններ և սահմանվել է ամենօրյա հսկողություն:

Ամենօրյա հսկողության ներքո է նաև մայրաքաղաքում եղևնիների և սոճիների համար հատկացված տեղերում բացօթյա առևտրի կազմակերպումը:

Առողջապահության վարչության պետը զեկուցել է, որ շուկաների և ստորգետնյա անցումների սանիտարական վիճակի հետ կապված ստուգայցերի արդյունքում վիճակն այժմ գնահատվում է բավարար, իսկ այն տնտեսվարողների հանդեպ, որոնք կխախտեն սահմանաված կարգը, կկիրառվեն համապատասխան միջոցառումներ:

Հանձնարարվել է նաև գույքագրել լուսավորության անհրաժեշտություն ունեցող գետնանցումները և խնդրի լուծման ուղղությամբ համապատասխան առաջարկություն ներկայացնել: