Նպատակն էր նախագծել այնպիսի մի շենք, որը առաջին իսկ հայացքից կգրավեր անցորդին. Ալբերտ Գալստյանը՝ Reebok-ի նախագծի մասին

Reebok մարզական ակումբի շենքը իր տեսքով արդեն իսկ մարմնավորում է շարժումը: Շենքի ճարտարապետության հիմքը մուգ գույներն են, երկրաչափական կառուցվածքը և արտասովոր ասիմետրիկ արտաքին տեսքը: Շենքի ներսում և դրսում մասշտաբային առարկաների առկայությունը փոխանցում է սպորտի և առողջության կենտրոնների ընդհանուր գաղափարը` դինամիկ էներգիա, արդիականություն և շարժում: Ինչպես են ոլորտի լավագույն մասնագետներն աշխատել այս գաղափարի վրա, ինչպես են այն ստեղծել։ 

-Թեմայի շուրջ զրուցել ենք Futuris Architects ընկերության համահիմնադիր Ալբերտ Գալստյանի հետ։ 

-Ամեն մի նախագիծ իրականացնելիս մենք շեշտը դնում ենք հարմարավետության վրա։ Reebok-ի նախագիծը սկսելիս նախ ամենայն մանրամասնությամբ ուսումնասիրել ենք լսարանը՝ ովքեր և ինչ տարիքի մարդիկ են օգտվելու ծառայություններից, որոնք են նրանց պահաջները, ինչ նախասիրություններ և ինչպիսի մտածելակերպ կարող են ունենալ։ Այնուհետև հաշվի առնելով պատվիրատուի ցանկությունները՝ առաջարկել ենք մեր լուծումները։ Նպատակն էր նախագծել այնպիսի մի շենք, որը առաջին իսկ հայացքից կգրավեր անցորդին։ Կարծում եմ՝ մենք հասանք մեր նպատակին։ Շենքը իր արտասովոր արտաքին տեսքով ռիթմ է հաղորդում և անկախ քեզնից այդ ռիթմի մի մասը դառնալու ցանկություն է առաջանում։ Մուգ գույները շենքին խորհրդավորություն են տալիս, որի արդյունքում մարդկանց մոտ հետաքրքրություն է առաջանում՝ ինչ է կատարվում շենքի պատերի ներսում։ 

-Այն, որ սպորտային համալիրը տարբերվում է գունային ու դիզայներական յուրահատուկ լուծումներով ակնհայտ է հենց դրսից։ Ներսի նախագծային աշխատանքները որքանով են արտացոլում և՛ պատվիրատուի, և՛ այցելուի նախասիրությունները։ 

-Ինչպես նշեցի մենք մինչ նախագիծը սկսելը ուսումնասիրություն ենք կատարում։ Հիմնականում պատվիրատուի ցանկություններն ու հաճախորդների նախասիրությունները համընկնում են, քանի որ պատվիրատուն մինչ մեզ դիմելն արդեն լավ քաջատեղյակ է լինում իր լսարանին։ Այն, որ միջավայրը կարող է մոտիվացնել և ոգեշնչել, գաղտնիք չէ։ Մենք մեր առջև նպատակ էինք դրել ստեղծել այնպիսի մի միջավայր, որ, օրվա անցուդարձից ուժասպառ եղած մարդն անգամ մարզասրահ այցելեուց մոտվիացվի։ Շենքը ներսից էլ իր էներգիան չի կորցրել, հակառակը՝ ավելի դինամիկ է։ Եկեք պատկերացնենք․ սիրուն արտաքինով մարդը կարող է կորցնել իր հետաքրքրությունը, եթե ներքին գեղեցկություն չունենա։ Նույնն էլ կարող ենք ասել շենքի մասին։ 

-Նմանատիպ համալիրներ նախագծելիս ինչի՞ վրա եք ավելի շատ շեշտը դնում։

 -Շեշտը միշտ դրվում է հարմարավետության վրա։ Դուք կարո՞ղ եք փոքր, բայց մոդայիկ ու սիրուն կոշիկ հագնել, որը ձեր ոտքն ակնհայտորեն սեղմում է։ Չե՞ք կարող, չէ՞։ Նույնն էլ բնակելի շենքերի, բնակարանների, ռեստորանների, բանկերի, օֆիսների և ալնի դեպքում։ Ստեղծագործելու համար անհրաժեշտ են հարմար պայմաններ։ Ի վերջո ապրելն էլ է ստեղծագործություն։ 

-Ալբերտ, սա ձեր թիմի թվով որերորդ նախագիծն է, որը հաջողությամբ կյանքի է կոչվում։ 

-Հաջողությունը չափելի է, իսկ մենք չափման միավորների հետևից չենք գնում։ Որքանով է դժվար ամեն անգամ ստանալ նորն ու չտարբերվողը։ 

-Ո՞րն է Ֆուտուրիսի հաջողության գրավականը։ 

-Երբ սիրում ես աշխատանքդ դժվարություններն աչքիդ չեն երևում։ Դժվարությունները ավելի լավը դառնալու հնարավորություններ են։ Իհարկե, կախված մարդու ընկալումից։ Ֆուտուրիսի հաջողության գրավականն էլ հենց ֆուտուրիսցիների ընկալման ու աշխարհայացքի մեջ է։

Հարցազրույցը՝ Կարինե Գևորգյանի