Մեծ Բրիտանիայում կանխատեսվում է վառելափայտի պահանջարկի աճ` «ծանր ձմռանն» ընդառաջ. Telegraph

Մեծ Բրիտանիայում վառելափայտ վաճառողները կանխատեսում են, որ իրենց վաճառքն այս ձմռանը նախորդ տարվա համեմատ կավելանա մոտ 20%-ով՝ երկրում էներգետիկ ճգնաժամի պատճառով, գրում է The Daily Telegraph-ը։

«Մարդիկ արդեն սկսում են պաշարներ հավաքել, բայց կարծում եմ, որ առաջիկա ձմռանը կարող ենք տեսնել պահանջարկի 10-20% աճ, քանի որ թեև վառելափայտը թանկացել է, դա ոչինչ է էլեկտրաէներգիայի թանկացման համեմատ»,- ասել է Նիկ Սնելը՝ թագավորության վառելափայտի ամենախոշոր մատակարարի՝ Certainly Wood-ի գործադիր տնօրենը:

Նրա հաշվարկներով՝ ձմռանը տունը տաքացնելու վառելափայտը բրիտանացի ընտանիքի համար կարժենա մոտ 600 ֆունտ (710 դոլար): 2021 թվականի համեմատ Մեծ Բրիտանիայից վառելափայտի գներն աճել են 10-15%-ով, իսկ մայրցամաքային Եվրոպայից՝ էլ ավելի։ Սնելը դա բացատրել է նրանով, որ նախկինում ապրանքների զգալի մասը ներկրվում էր Ռուսաստանից և Բելառուսից, սակայն պատժամիջոցների սահմանումից հետո տրանսպորտային ծախսերն ավելացել են։