Հայրենիքը փրկելու համար պետք է, նախ, ազատագրվենք ներսի թշնամիներից․ Գևորգ Գևորգյան

Հաշված օրերից Ադրբեջանին կհանձնվեն Բերձորը, Աղավնոն, Սուսը։ Ինչքան էլ հանրային ու քաղաքական շրջանակները, տարբեր ակտիվիստներ, գործիչներ ջանքեր են գործադրում՝ կասեցնելու այս կործանարար գործընթացը, գնալով մարում է հույսը, որ առարկայական ու բաղձալի որևէ արդյունք կգրանցվի։ Հերթական հայաթափումն ու տարածքային կորուստը գրեթե անխուսափելի են։ 

«Որպեսզի մենք կարողանանք ազատագրել մեր ամբողջ հայրենիքը՝ Հայաստան աշխարհն ու Արցախ աշխարհը, պետք է ազատագրվենք մեր ներսի թշնամիներից, որովհետև դրսի թշնամին կարողանում է անպատիժ ու վստահ առաջ գալ միայն ու միայն ներսի թշնամու՝ ճանապարհը բացելու միջոցով, ներսի թշնամիների դավաճանության, դավաճանական քայլերի պատճառով»,- ԼՈՒՐԵՐ․com-ի հետ զրույցում շեշտեց «Հայ ազգային ճակատի» հիմնադիր, ռազմական գործիչ Գևորգ Գևորգյանը։

«Առաջին խնդիրն այս պահին բոլոր ռեսուրսները կենտրոնացնելն ու այս իշխանություններին հեռացնելն է, որովհետև իշխանություն զավթածները թուրքերի դաշնակիցն են, որոնց հետ պլանավորված աշխատում են։ Այս ճանապարհին պետք է մի կողմ դնենք բոլոր տարաձայնությունները։ Մենք իրապես ունենք հիասքանչ հնարավորություն։ Օգոստոսի 23-ին կարող ենք բոլորս գալ Հանրապետության հրապարակ, հանրության ձայնը բարձրացնել, որովհետև մեր բուն նպատակը Նիկոլին հեռացնելն է, և, վստահ եղեք, նրան հեռացնելը ժամերի հարց է»,- համոզմունք հայտնեց մեր զրուցակիցը։

Գևորգյանը վստահ է՝ երբ հայն արթնացել է իր արժանապատվության պայքարի համար, թուրքը միշտ էլ վախեցել ու վախենալու է հայից։ Նա խոստովանեց նաև, որ հայության վիճակն այս պահին օրհասական է, ծանր է և որ միայնակ ոտքի կանգնել հնարավոր չէ։ Այդ համատեքստում, ռազմական գործիչը կարևորեց ՀՀ դաշնակիցների, միջազգային գործընկերների աջակցությունը, այդ թվում՝ դիվանագիտական հարթակներում։

«Այս իշխանությունների կեղտոտ, դավաճանական քաղաքականության պատճառով վատացել են նաև մեր երկրի հարաբերությունները մեր ռազմավարական դաշնակցի՝ Ռուսաստանի, մեր հարևան, բարեկամ երկրների հետ։ Բայց դա ևս ժամանակավոր է․ սրանց արմատախիլ անելով, հեռացնելով և համակարգային փոփոխությունների միջոցով բերելով ազգային իշխանություն՝ հավատացեք, շատ կարճ ժամանակ հետո, նույն այդ ռազմավարական դաշնակից գործընկերոջ ու մյուս երկրների հետ բարելավելու ենք մեր փոխհարաբերությունները՝ հիմնված փոխադարձ հետաքրքրությունների և ազգային շահերի վրա»,- նշեց Գևորգ Գևորգյանը։

Հայրենիքի փրկության նրա բանաձևը հաստատուն է՝ հեռացնել ապազգային իշխանություններին և ամրագրել ազգային իշխանություն, արժանապատիվ, հզոր ու անվտանգ ապագա ունենալու համար։

Արա Ալոյան