Թուրքիան չի մեղադրում Մոսկվային Սիրիային զենք մատակարարելու համար

Թուրքիան բողոք չունի Ռուսաստանի նկատմամբ բեռի փոխադրման կապակցությամբ, որն առգրավվել էր Մոսկվայից Դամասկոս թռչող սիրիական ինքնաթիռում։ Այս մասին երեկ The Hurriyet Daily News պարբերականին հայտնել է անանուն թուրք պաշտոնատար անձը. փոխանցում է Lenta.ru-ն։

«Մենք ամենասկզբից ասում էինք, որ Սիրիան փորձել է անօրինական ճանապարհով բեռ տեղափոխել։ Այդ պատճառով մեր բողոքն ուղղված է ոչ թե Մոսկվային, այլ Դամասկոսին»,-ասել է նա թերթին։

Աղբյուրը նաև նշել է, որ թուրքական իշխանությունները սկզբում զգուշացրել են ինքնաթիռի անձնակազմին (մինչ ինքնաթիռը կհայտնվեր Թուրքիայի օդային տարածքում), և միայն դրանից հետո ստիպել են, որ օդանավը վայրէջք կատարի։

Ըստ Թուրքիայի արտգործնախարար Ահմեդ Դավութօղլույի՝ Դամասկող թռչող սիրիական ինքնաթիռը ստիպողաբար վայրէջք է կատարել, քանի որ Սիրիան խախտել է փոխադրման կանոնները և քաղաքացիական ինքնաթիռով տեղափոխել է զինամթերք. նախարարի խոսքերը փոխանցում է Anadolu գործակալությունը։

Այսպիսով, Թուրքիան առգրավել է սիրիական ինքնաթիռում հայտնաբերված բեռը ոչ թե այն պատճառով, որ Մոսկվայի և Դամասկոսի միջև գործարքը համարում է անօրինական, այլ բացառապես Սիրիայի անօրինական գործողությունների համար. ընդգծել է Դավութօղլուն։