Գալուստ Սահակյան. Պետք է դողանք ամեն լումայի համար (տեսանյութ)

ՀՀ Կառավարությունը շարունակում է ուսումնասիրությունները և բացահայտումները գերատեսչություններում: Դեռևս առավել խոշոր բացերը եղել են Առողջապահության և Սոցապ նախարարություններում: Բացեր են եղել նաև պաշտպանության և քաղաքաշինության նախարարություններում: Նշված երեք նախարարությունները ժամանակին ղեկավարվել են ԲՀԿ-ական նախարարների կողմից: Շատերի կարծիքով դա կառավարության կողմից արվում է հատուկ:

Լուրեր.com-ի հետ զրույցում ՀՀԿ փոխնախագահ, ԱԺ ՀՀԿ խմբակցության ղեկավար Գալուստ Սահակյանը նշեց, որ իր կարծիքով դա հատուկ չի արվում: «Դրա համար կա բանաձևումը: Այսօր աշխարհը նորից խոսում է նոր տնտեսական ճգնաժամերի մասին: Մեր հայեցակարգը ընդամենը հետևյալն է՝ պետք է պաշտպանել ամեն մի լումա: Դրա համար էլ այն նախարարություններում, որտեղ խոսակցությունները շատ են, ուսումնասիրություներ են կատարվում, դա կապել ԲՀԿ-ի հետ ճիշտ չեմ համարում, որովհետև ի՞նչ կապ ունի ԲՀԿ-ի նախարարը որոշակի հանցագործությունների հետ, որ նախարար է եղել, դրա՞ համար: Ինչ-որ չարաշահումներ լինում են, և կարծում եմ՝ վերլուծություններ են գնում, և կամաց-կամաց չինովնիկական կազմը մի քիչ ավելի կազմակերպված է լինում: Մենք, եթե այսօր չհասնենք նրան, որ ամեն լումայի վրա չդողանք և նույն սրությամբ տնտեսական ճգնաժամ եղավ, շատ վատ վիճակի մեջ կնգնենք: Այսինքն՝ դա չի արվում է հենց այնպես, որ այսօր ցանկացան և արեցին կամ ինչ-որ մեկի դեմ է ուղղված, հետո մեզանում այդպիսի նստվածք չկա: Ես երբեք ինձ թույլ չեմ տա ինչ-որ նախարարի ասեմ՝ սա մեր նախարարն է, որովհետև կառավարությունը մեկ օրգանիզմ է: Բոլորը մեր նախարարներն են և՛ ԲՀԿ-ինը, և՛ ՀՀԿ-ինը և՛ Օրինացինը: Դուք հիմա ուզում եք մտածել, որ Հանրապետականը ինչ-որ մարդկանց նկատմամբ վրեժխնդիր է լինում, բայց դա այդպես չի կարելի համարել»,-նշեց Սահակյանը:

Իսկ թե որն է պատճառը, որ կառավարության ղեկավարը հանձնարարել է հարկային հաշվետվությունն առաջինը ներկայացնել այն նախարարություններին, որոնք վերջին շրջանում ստվերում են, և թողնելով այն գերատեսչությունները, որոնցում բավականին բացեր կան,  ՀՀԿ խոսնակն ասաց. «Բոլորն էլ այդ հաշվետվությունը տալու են, ես չեմ կարծում՝ ինչ-որ մեկին թողել են մի նպատակով, մյուսին վերցրել են ուրիշ նպատակով: Հերթականությամբ բոլորն էլ այդ հաշվետվությունը տալու են»,-ասաց ՀՀԿ խմբակցության ղեկավարը: