Ահաբեկչություն թուրք-իրանական գազատարի վրա. Կա 28 վիրավոր

Թուրք-իրանական գազատարի վրա կազմակերպված ահաբեկչության արդյունքում տուժել է թուրքական բանակի 28 զինծառայող: Տեղական հեռուստաընկերությունը հաղորդում է, որ պայթյունը հնչել է այս գիշեր Աղրի արևելյան նահանգում: Ներկա դրությամբ հրդեհը մարված է, իսկ գազի մատակարարումը դադարեցվել է. փոխանցում է ИТАР-ТАСС-ը:

Նահանգապետի հաղորդած տվյալներով՝ ահաբեկիչներն օգտագործել են հեռակառավարվող ռումբ: Այն գործի է դրվել, երբ զինվորականների ավտոբուսն ընթանում էր գազատար մայրուղու երկայնքով: Զինվորականների մեծ մասը թեթև վնասվածքներ է ստացել, սակայն կան նաև ծանր վիրավորներ:

Թուրքական իշխանությունները կարծում են, որ ահաբեկչությունը կազմակերպել են քուրդ ծայրահեղականները, որոնք հաճախ են դիմում ռազմական փոխադրամիջոցների ահաբեկման ծայրահեղ միջոցներին: