Բողոքի ակցիա դատախազության մոտ. Սա այն հայրենիքը չէ, որ խոստացել եք մեզ ժառանգություն թողնել (տեսանյութ, ֆոտոշարք)

Այսօր տեղի ունեցավ «Սիվիլիթաս» հիմնադրամի աշխատակիցների երթը դեպի ՀՀ գլխավոր դատախազություն: Երթին մասնակցում էին «Սիվիլիթաս» հիմնադրամի աշխատակիցները և քաղաքացիական տարբեր շրջանակներ ներկայացնող քաղաքացիներ: Երթի մասնակիցները դատախազության ներկայացուցիչներին հանձնեցին նամակ-պահանջագիրը և ստորագրահավաքին միացած ավելի քան 13,000 անձանց ստորագրությունների պատճեները: Նամակ պահանջագրում մասնավորապես ասվում էր.

«Մենք՝ մութ ու ցուրտ տարիներին մոմի լույսի տակ դաս սովորած, գիշերները ականի սուլոցներից գլուխը բարձի տակ թաղած, այսօր արդեն՝ երիտասարդներս, մենք'մեր հայրենիքի համար անկախություն կերտող զավակներս, ահազանգում ենք'սա այն հայրենիքը չէ ու չի էլ նմանվում նրան, որ մեզ խոստացել ու խոստանում եք ժառանգություն թողնել:

Մենք ուզում ենք հայրենիք, որտեղ մարդու և քաղաքացու իրավունքները արժևորվում և գնահատվում են, որտեղ մարդը, նրա արժանապատվությունը, իրավունքները և ազատությունները բարձրագույն արժեքներ են: Մենք պահանջում ենք հայրենիք, որտեղ բոլոր մարդիկ հավասար են օրենքի առջև, որտեղ օրենքներն են բարձր ամենից ու ամենքից: Մենք արդարություն ու արդարադատություն ենք պահանջում մեր հայրենիքում:

«Սիվիլիթաս» հիմնադրամի և նրա հիմնադիր Վարդան Օսկանյանի նկատմամբ հետապնդումները վկայում են Հայաստանում ժողովրդավարության տկարության և դրա էլ ավելի թուլացման մասին: Այս գործը առաջին նախադեպը չէ, այն մեր երկրում տիրող անպատժելիության և ամենաթողության հերթական դրսևորումն է: Սա միայն մեկ քաղաքական գործչի, մեկ կազմակերպության կամ այդ կառույցի աշխատակիցների հարցը չէ, սա երկրու իրավական, քաղաքական և բոլոր ոլորտների անառողջության դրսևորումն է:

Սահմանադրությամբ ժողովրդավար, իրականում ժողովրդավարությունից ավելի ու ավելի հեռացող Հայաստանում այսօր խեղդվում է ցանկացած տեսակի մրցակցություն՝ տնտեսականից մինչև քաղաքական: Խոսքի ազատությունը Սահմանադրությամբ ամրագրած Հայաստանում մարդիկ և կառույցները հետապնդվում են սեփական կարծիքն արտահայտելու և քննադատելու համար:

Մենք մեր անհանդուրժողականությունն ենք հայտնում ամենաթողության հանդեպ: Մենք և մեր կոչին տասնյակ երկրներից միացած հազարավոր մարդիկ պահանջում ենք դադարեցնել քաղաքական ճնշումները «Սիվիլիթաս» հիմնադրամի և նրա հիմնադիր Վարդան Օսկանյանի նկատմամբ, մենք պահանջում ենք «Սիվիլիթասին» և Օսկանյանին առնչվող գործի արդար հանգուցալուծում, մենք արդարադատություն ենք պահանջում»: