Հիլարի Քլինթոնը ռուսական գազի դեմ

ԱՄՆ-ն շարունակելու է աջակցել «Հարավային միջանցք» նախագծի իրականացմանը, որը կթուլացնի Եվրոպային գազի մատակարարման մենաշնորհը: Այս մասին հաղորդել է ԱՄՆ-ի պետքարտուղար Հիլարի Քլինթոնը Ջորջթաուն համալսարանում իր «21-րդ դարի էներգետիկ դիվանագիտությունը» թեմայով դասախոսության ժամանակ:

Ինչպես հաղորդում է Интерфакс-ը, պետքարտուղարը նշել է, որ իրենց հիմնական նպատակն է առողջ մրցակցության խթանումը և այդ ոլորտում մենաշնորհի դեմ պայքարը:

«Տասնամյակներ շարունակ շատ եվրոպական երկրներ իրենց գազային պաշարները ստանում էին մեկ երկրից՝ Ռուսաստանից: Սակայն հիմա իրավիճակը փոխվել է: Համաշխարհային շուկայում հայտնվել են գազի ավելի շատ չիրացված պաշարներ: Բացի այդ՝ այժմ գազ կարելի է ստանալ մերձկասպյան շրջանից և Կենտրոնական Ասիայից: Այս շրջանները ցանկանում են այդ պաշարները վաճառել, իսկ Եվրոպան ցանկանում է դրանք ձեռք բերել: Մնում է միայն ջանքեր գործադրել խողովակաշարերի անցկացման ուղղությամբ»,-ասել է Հիլարի Քլինթոնը։ Նա նշել է, որ հենց դրանում է «Հարավային միջանցք» նախագծի էությունը, որը նախատեսում է խողովակաշարերի կառուցումը Եվրոպայի տարածքով:

«Հարավային միջանցքը» նախատեսում է գազատարերի անցկացում Կենտրոնական Ասիայից և մերձկասպյան շրջաններից դեպի Եվրոպա՝ շրջանցելով Ռուսաստանը: Դրա նպատակն է վերացնել այդ ոլորտում գազի մատակարարման մենաշնորհը, որը նպաստում է էներգետիկայի ոլորտում ռիսկերի մեծացմանը: