Ոստիկանությունը կապահովի՞ Մհերյանի գործով սենսացիոն հայտարարություն անողի անվտանգությունը

Այսօր մամուլի հրապարակումներից մեկում անդրադարձ էր եղել վերջերս քրեակատարողական հիմնարկից ազատ արձակված Գրիգոր Իգիթյանին, ով համարվում էր կասկածյալ ՀՀ ոստիկանապետի տեղակալ Գևորգ Մհերյանի սպանության գործում։

Վերջինս ազատ արձակվելուց կարճ ժամանակ անց հանդես է եկել սենսացիոն հայտարարություններով լի պարզաբանմամբ, ըստ որի՝ ոստիկանության որոշ բարձրաստիճան պաշտոնյաներ տարբեր հնարքներով փորձել են հասնել այն բանին, որ ինքն իր վրա վերցնի Գ.Մհերյանի սպանությունը:

Հիշյալ հայտարարությունը կատարելուց առաջ Գ.Իգիթյանն ասել է. «Քանի որ հայտարարության մեջ հնչելու են մարդկանց անուններ և, ամենայն հավանականությամբ, նրանց կողմից կատարված իրավախախտումների մասին, և այդ մարդիկ հզոր ուժ են իրենցից ներկայացնում, ես կցանկանայի, որ այս հայտարարությունը հրապարակելուց հետո առաջին հերթին ապահովեին իմ և իմ ընտանիքի անվտանգությունն այն պատճառով, որ նման փորձեր եղել են, եղել է կյանքի սպառնալիք իմ նկատմամբ, իմ ընտանիքի նկատմամբ»:

Lurer.com-ը կապ հաստատեց Ոստիկանության հասարակայնության հետ կապերի և լրատվության վարչության պետ Աշոտ Ահարոնյանի հետ, ով նշեց, որ ծանոթ են հրապարակմանը, և նախաքննական մարմինը որոշում կկայացնի։

Հիշեցնենք, որ ՀՀ փոխոստիկանապետ, ոստիկանության գնդապետ 34-ամյա  Գևորգ Մհերյանը 2009 թվականի փետրվարի 3-ին իր տան մուտքի մոտ հրազենից արձակված կրակոցներով սպանվել էր:

Հանցագործությունը դեռևս բացահայտված չէ։