Պետությունը պետք է բոլորի համար ապահովի հավասար հնարավորություններ. Ալբերտ Աբգարյան

Այսօր ՀՀԿ փոխնախագահ, ԱԺ ՀՀԿ խմբակցության ղեկավար Գալուստ Սահակյանը լրագրողներից մեկի հարցին պատասխանել էր՝ «ԱԺ-ում 1-2 հոգի են ընդամենը հաշմանդամ՝ Արման Մուշեղյանը և էլի մի հոգի, ու իրանց համար ի՞նչ այդքան ծախս անենք, դա լուրջ ծախս է»: Սահակյանին արձագանքել էր Արման Մուշեղյանի կինը՝ «Ես Yes!» ամսագրի գլխավոր խմբագիր Անի Քոչարը: 

Լուրեր.com-ի հետ զրույցում հաշմանդամների խնդիրներով զբաղվող «Հարմոնիա» ՀԿ նախագահ Ալբերտ Աբգարյանը, պատասխանելով այն հարցին, թե ինչ պարտավորություններ ունի պետությունը հաշմանդամների խնդիրների լուծման ուղղությամբ, ասաց. «ՀՀ իշխանությունների կողմից որդեգրվել է քաղաքականություն, որով պետությունը աստիճանաբար պետք է ապահովի բոլորի համար հավասար հնարավորություններ, այդ թվում նաև հաշմանդամություն ունեցող անձանց համար պետք է ստեղծվեն այնպիսի պայմաններ, որ այս կամ այն ֆիզիկական խնդիր ունեցող անձինք կարողանան տեղաշարժվել, կրթվել, աշխատել և առհասարակ ունենան լիարժեք հնարավորություն ինքնադրսևորվելու:

Հիշեցնում եմ, որ յուրաքանչյուր ոք օգտվում է նույն իրավունքներից և օրենքի առաջ պատասխանատու է համապատասխանաբար հավասարաչափ։ Եթե անձն ունի որոշակի ֆիզիկական սահմանափակում, դա դեռ չի նշանակում, որ զրկված է երկրի կառավարման կամ այս կամ այն ոլորտում իրենց դրսևորելու իրավունքից և հնարավորությունից, առավել ևս, որ պետությունն իր օրենսդիր մարմնում արդեն վավերացրել է հաշմանդամների իրավունքների ՄԱԿ-ի միջազգային կոնվենցիան»: