Հենրիկ Մխիթարյանի ֆենոմենը. յուրաքանչյուր 3-րդ հարվածը գոլ է

Ուկրաինական «Команда»-ն անդրադարձել է Ուկրաինայի առաջնության ռմբարկու Հենրիկ Մխիթարյանին, նշելով, որ հայ ֆուտբոլիստն այս տեմպերով խնդիր չի ունենա գերազանցելու Սերգեյ Ռեբրովի և Մաքսիմ Շացկիխի հաջողությունները՝ 22 գոլ մեկ առաջնությունում։

«Հենրիկ Մխիթարյանի գլխավոր խաղաթուղթը դաշտի բոլոր հատվածներում հաջող ելույթ ունենալու կարողությունն է։ Մխիթարյանը  մասնակցում է իր թիմի գրեթե յուրաքանչյուր երկրորդ գրոհին։ Մի խոսքով իր գործի վարպետն է. սկսում է գրոհը, օգնում ընթացքում և ավարտում այն։ Ուշադրության է արժանի նաև ընթացիկ մրցաշրջանի գլխավոր հերոսի հարվածների բարձր ճշգրտությունը։ Նրա հարվածների 70 %-ն ընթանում է դեպի դարպասը, իսկ 3 հարվածից մեկն ավարտվում է գոլով: Հետաքրքրականն այն է, որ «Շախտյորի» կիսապաշտպանը մրցակցի դարպասներին սպառնացել է բոլոր 14 խաղերում (ներառյալ Չեմպիոնների լիգան և Ուկրաինայի գավաթի խաղարկությունը)։ Նման  վիճակագրական տվյալներին կարելի է միայն նախանձել։ Սակայն եթե նույնիսկ դուք տիրապետեք այս ֆուտբոլիստի բոլոր տվյալներին, նրա ֆենոմենը բացատրել, միևնույն է, չի ստացվի: Տպավորություն է ստեղծվում, որ Հենրիկ Մխիթարյանը խաղադաշտում  կարողանում է ամեն ինչ. չի լինի ճշգրիտ փոխանցում, նա կխլի գնդակը, եթե անհատական խաղը չստացվի, նա թիմային խաղ կխաղա»,-նշում է ուկրաինական թերթը: