Մեր հայրենակից Միշել Լեգրանն իր 80-րդ հոբելյանը կնշի Հայաստանում

Աշխարհահռչակ հայազգի անվանի կոմպոզիտոր, դաշնակահար և երգիչ Միշել Լեգրանը Հայաստան է եկել Հայաստանի պետական ֆիլհարմոնիկ նվագախմբի կողմից իր 80-րդ հոբելյանի և Երևանյան 6-րդ միջազգային երաժշտական փառատոնը փակելու առթիվ։

Նա 3 անգամ արժանացել է «Օսկար»-ի, 5 անգամ՝ «Գրեմի» և «Էմմի», 12 անգամ՝ «Ոսկե գլոբուս» մրցանակների: 2003թ.-ին ստացել է «Պատվո լեգեոն» շքանշանը: Իսկ Հայաստանից նա փափագում է ունենալ տաղանդավոր նկարիչ Մարտիրոս Սարյանի աշխատանքներից։
Միշել Լեգրանը ավելի շատ հայտնի է ֆիլմերի /շուրջ 200/ համար գրված իր երաժշտությամբ: Նրան մեծ հռչակ է բերել «Շերբուրգյան անձրևանոցներ» ֆիլմը:

Հոկտեմբերի 20-ին Օպերայի և բալետի պետական թատրոնում Հայկական ֆիլհարմոնիկ նվագախումբը կներկայացնի «Միշել Լեգրան. 80-րդ տարեդարձ»-ի նշումը Հայաստանում՝ մասնակցությամբ Կատերին Միշելի։

Ի դեպ, երաժիշտը այսօր տված ասուլիսում նշեց, որ այժմ աշխատում է իր առաջին բալետի վրա։ Պատրաստվում է նաև նկարահանել ֆիլմ-մյուզիքլ։

Ինչ վերաբերում է իր 80 ամյակին, ապա Լեգրանը խոստովանեց, որ իր տարիքը չի զգում, և այն իր համար ծանրությյուն չէ։