Խոսրով-Խաչաձոր տեղամասերի սահմանագծի հրդեհը՝ կայծակի հետևանք

Ս/թ. հոկտեմբերի 9-ին ժամը 10.00-ի սահմաններում ՊՈԱԿ հրշեջ ծառայության հերթական շրջագայության ժամանակ Խոսրով-Խաչաձոր տեղամասերի սահմանագծի վրա նկատվել է կայծակահարությունից ծխացող գիհու մեկ ծառ՝ իր բնի շրջագծի խոտածածկ տարածքով: Այս մասին հայտնում է ՀՀ բնապահպանության նախարարության մամլո ծառայությունից։

Անմիջապես ահազանգվել է հերթապահություն իրականացնող անձնակազմին, և վերջիններս սեփական ուժերով և միջոցներով սկսել են հրդեհաշիջման աշխատանքները: Հրդեհամարման աշխատակիցներին օգնության են եկել մյուս երեք տեղամասերի անձնակազմը և ՊՈԱԿ-ի այդ օրվա աշխատանքներից ազատ մյուս աշխատակիցները:

Մարման աշխատանքներին մասնակցել են նաև Վայրի բնություն և մշակույթային արժեքների պահպանման հիմնադրամ հասարակական կազմակերպության 20 անդամներ: Ուժգնացող քամին նպաստել է հրդեհի արագ տարածմանը այդ իսկ պատճառով 11.45-ին ահազանգվել է արտակարգ իրավիճակների նախարարության փրկարար ծառայության մարզային: 12.20-ից հրդեհամարման աշխատանքներին մասնակցել են Արարատի մարզային և Վեդի քաղաքի հրշեջ խմբերը:

Համատեղ կատարված աշխատանքների շնորհիվ այրումից զերծ է մնացել ծառածածկ տարածքները, սակայն այրվեց 7-8 հա խոտածածկ տարածք: