Ա. Աշոտյան. «Մենք մեր տեղը գիտենք ԱՊՀ տարածքում. այն առաջատարների խմբում է»

Երևանի պետական համալսարանում տեղի է ունեցել ԱՊՀ անդամ պետությունների կրթության ոլորտի աշխատողների և ուսուցիչների 2-րդ համագումարի աշխատանքների ամփոփումը: Ազդարարելով համագումարի փակումը՝ ՀՀ կրթության և գիտության նախարար Արմեն Աշոտյանը շնորհակալություն է հայտնել ԱՊՀ անդամ պետությունների պատվիրակություններին և անձամբ յուրաքանչյուր պատվիրակին՝ բաց և շահագրգիռ քննարկումների համար: Նախարարն ընդգծել է, որ ԱՊՀ անդամ երկրներում կրթական զարգացումներն, իհարկե, նման են, սակայն ունեն նաև շատ առանձնահատկություններ:

Այդ իմաստով, ըստ Ա. Աշոտյանի, շատ արդունավետ է եղել լավագույն փորձի փոխանակումը. օտարերկրյա պատվիրակներին, մասնավորապես, հետաքրքրել է Հայաստանի փորձը՝ ավագ դպրոցների ցանցի ստեղծման, 12-ամյա կրթության, հանրակրթական դպրոցներում շախմատի դասավանդման, բարձրագույն կրթության վկայականի միջազգային ճանաչման, Բոլոնիայի քարտուղարության աշխատանքներում ներգրավվածության տեսանկյունից: «Մեր առաքելությունն է լինել այն կրթական հարթակներում, որտեղ հայ քաղաքացին, կրթության շահառուն, կարող է իր համար ստանալ շահավետ կրթական առաջարկ: Մենք մեր տեղը գիտենք ԱՊՀ տարածքում, և այն, վստահեցնում եմ ձեզ, առաջատարների խմբում է, քանի որ հայ մարդը կրթության նկատմամբ ունի պաշտամունքային վերաբերմունք և ցանկանում է լսել ցանկացած արդյունավետ առաջարկ՝ երբեմն նաև այլոց սխալները չկրկնելու համար: Համոզված եմ, որ համագումարի հետքը մնալու է ոչ միայն փաստաթղթի վրա, այլև կյանքի է կոչվելու»,-նշել է նախարար Արմեն Աշոտյանը: Փակման արարողությանը հանդես են եկել նաև ԱՊՀ անդամ այլ երկրների պատվիրակներ:

Համագումարի ավարտին միաձայն ընդունվել է ԱՊՀ անդամ պետությունների կրթության ոլորտի աշխատողների և ուսուցիչների 2-րդ համագումարի բանաձևը: