Փոխվարչապետն աշխատանքային այցով Վայոց Ձորի եւ Սյունիքի մարզերում էր

ՀՀ փոխվարչապետ, տարածքային կառավարման նախարար Արմեն Գեւորգյանն այսօր առավոտյան խոհրդակցություն անցկացրեց Վայոց Ձորի մարզպետարանում, որի օրակարգում էին համայնքներում սեփական եկամուտների հավաքագրման, մարզում իրականացվող ծրագրերի, գյուղատնտեսական աշխատանքերի ընթացքին վերաբերող հարցեր: Խորհրդակցությանը մասնակցում էին մարզպետ Էդգար Ղազարյանը, մի շարք համայնքների ղեկավարներ, մարզպետարանի պատասխանատուներ:

Զեկուցվեց, որ 2012թ. հոկտեմբերի 1-ի դրությամբ մարզի համայնքների բյուջեների փաստացի մուտքերը նախատեսված 770,2 մլն դրամի դիմաց կազմել են 739,4 մլն դրամ, կատարողականը 96% է: Սեփական եկամուտների կատարողականը (5 հարկատեսակների գծով) կազմել է 85.5%, միայն 11 համայնքում է արձանագրվել 70%-ից ցածր ցուցանիշ:

Փոխվարչապետն ընդհանուր առմամբ դրական համարեց մարզի համայնքներում հավաքագրումների տեմպերը՝ միաժամանակ նշված 11 համայնքների ղեկավարներին հորդորելով ցուցանիշները բարելավել եւ ուշադրության կենտրոնում պահել վարչարարության ու հարկային կարգապահության խնդիրները:

Խորհդակցությանը քննարկվեցին մարզերի առաջնահերթ խնդիրների լուծման երրորդ ծրագրի ընթացքին եւ չորրորդի մեկնարկին առնչվող հարցեր: Մարզում երրորդ ծրագրով իրականացված աշխատանքների ֆիզիկական ծավալը կազմում է շուրջ 70 տոկոս: Չորրորդ ծրագրով մարզին հատկացված 261 մլն դրամը եւս կուղղվի մարզի համայնքներում դպրոցների, մշակույթի տների, բազմաբնակարան շենքերի տանիքների նորոգմանը, որոշ համայնքների գազիֆիկացմանը:

Փոխվարչապետին զեկուցվեց նաեւ Ջերմուկ քաղաքի կամրջի վերանորոգման ընթացքի մասին: Կառավարության օգոստոսի 30-ի որոշմամբ այդ նպատակով հատկացվել է 137 մլն դրամ: Տեղեկացվեց, որ արդեն կատարվել է աշխատանքների մոտ 65 տոկոսը, նորոգումը նախատեսվում է ավարտել մինչեւ նոյեմբերի կեսերը:

Անդրադարձ եղավ նաեւ գյուղատնտեսական խնդիրներին: Փոխվարչապետին զեկուցվեց, որ մարզում առաջիկա օրերին կավարտվի խաղողի մթերման գործընթացը: Վերամշակող ընկերությունները մարզի բնակչությունից արդեն մթերել են 2715 տոննա խաղող՝ կիլոգրամը նվազագույնը 220 դրամով: Նշվեց, որ աշխատանքներն իրականացվում են կազմակերպված: Բերքի դիմաց վճարումները ընկերությունները խոստացել են կատարել մինչեւ նոյեմբերի 1-ը:

Տեղեկություններ ներկայացվեցին նաեւ մարզում հողօգտագործողներին մատչելի գնով պարարտանյութ եւ դիզելային վառելանյութ տրամադրելու պետական ծրագրերի ընթացքի, առաջին վերարտադրության ցորենի սերմացուի հավաքագրման գործընթացի մասին:

Փոխվարչապետը խորհրդակցություն անցկացրեց նաեւ տարածաշրջանի ՋՕԸ-երի եւ ՏԿՆ ջրտնտպետկոմի պատասխանատուների մասնակցությամբ: Քննարկվեցին ոռոգման շրջանի ավարտի, ձեւավորված հասույթների դիմաց գանձումների ամբողջական ապահովմանն առնչվող հարցեր:

Վայոց ձորից փոխվարչապետը մեկնեց Սյունիքի մարզ, Տաթեւ համայնքում ծանոթացավ դպրոցի շենքի վիճակին, որը նախատեսվում է հիմնանորոգել Հայաստանի սոցներդրումների հիմնադրամի միջոցներով: Զեկուցվեց, որ կատարվում են նախագծային աշխատանքները, որի ավարտից հետո կհայտարարվի շինարարական աշխատանքների իրականացման մրցույթ:

Փոխվարչապետն այցն ավարտեց Տանձատափ համայնքում, որը Տաթեւի վանական համալիրի հարակից վեց գյուղերի թվում ընդգրկված է «Տաթեւի վերածնունդ» ծրագրում: Ա. Գեւորգյանը շրջայց կատարեց համայնքում, ծանոթացավ ենթակառուցվածքային հնարավորություններին: Համայնքապետարանում կայացած խորհրդակցության ընթացքում քննարկվեցին համայնքի առաջնահերթ խնդիրներն ու զարգացման հեռանկարները: