Բռնցքամարտի եվրոպական կոմիտեն (EUBC) շնորհավորել է Հայաստանի բռնցքամարտի ֆեդերացիային

Հոկտեմբերի 1-ից 7-ը Ռուսաստանի Դաշնության Անապա քաղաքում տեղի ունեցած Եվրոպայի պատանիների առաջնությունում Հայաստանի հավաքականի հաջող ելույթի կապակցությամբ, Բռնցքամարտի եվրոպական կոմիտեն (EUBC) հատուկ շնորհավորական ուղերձ է հղել Հայաստանի բռնցքամարտի ֆեդերացիային:

Հայաստանի բռնցքամարտի ֆեդերացիայի փոխնախագահ Սամվել Գասպարյանի խոսքերով. «Իրավամբ կարող եմ հպարտանալ մեր պատանի մարզիկներով, նրանք արժանավայել հանդես եկան այդ առաջնությունում, իսկ մեր 72 կգ քաշային Ալյոշա Ստամբոլցյանին, համարում եմ ոսկե մեդալակիր, քանի որ միայն մրցավարների կողմնակալության պատճառով մեր բռնցքամարտիկը զրկվեց ոսկե մեդալից: Նա կիսաեզրափակչում վստահորեն հաղթեց ուկրաինացի մարզիկին, իսկ եզրափակչում՝ 5 միավորով առաջ անցավ Ռուսաստանի ներկայացուցչից: Սակայն, անհասկանալիորեն մրցավարները հաղթանակը շնորհեցին ռուսաստանաբնակ մարզիկին: Իհարկե, եղածը էլ ետ չես բերի: Նշեմ, որ մենք գոհ ենք առաջնությանը մասնակցած պատանի հայ բռնցքամարտիկների ելույթներից: Նրանց հաջող մասնակցության մասին է վկայում նաև Բռնցքամարտի եվրոպական կոմիտեի (EUBC) հատուկ շնորհավորական ուղերձը»:

Հայաստանի հավաքականը առաջնությանը մասնակցել է 14 մարզիկներով, որոնցից 7-ը Հայաստան են վերադարձել մեդալներով՝ 2 արծաթ և 5 բրոնզ: Արծաթե մեդալների են արժանացել Արման Անտոնյանը 41,5 կգ քաշային կարգ (ք. Աբովյան, անձնական մարզիչ՝ Արշավիր Գրիգորյան) և Ալյոշա Ստամբոլցյանը 72 կգ քաշային կարգ (ք. Երևան, անձնական մարզիչներ՝ Վարդան Իգրարյան և Լևոն Նուխուդյան): Բրոնզե մեդալների են արժանացել Աշոտ Մխիթարյանը 40 կգ քաշային կարգ (ք. Երևան, անձնական մարզիչ՝ Էդուարդ Կոստանյան), Ռազմիկ Անտոնյանը 44,5 կգ քաշային կարգ (ք. Աբովյան, անձնական մարզիչ՝ Արշավիր Գրիգորյան), Հարություն Մնացականը 46 կգ քաշային կարգ (ք. Երևան, անձնական մարզիչ՝ Արթուր Իրիկյան), Զաքար Խաչատուրյանը 54 կգ քաշային կարգ (ք. Գյումրի, անձնական մարզիչ՝ Գարիկ Բաղդասայան) և Վան Մելքումյանը 62 կգ քաշային կարգ (ք. Արթիկ, անձնական մարզիչ՝ Ռուբիկ Առաքելյան):