Գագիկ Բեգլարյանն ընդունեց ՀԲ երեւանյան գրասենյակի ղեկավարին

Հայաստանի Հանրապետության տրանսպորտի եւ կապի նախարար Գագիկ Բեգլարյանը հոկտեմբերի 19-ին ընդունել է Համաշխարհային բանկի /ՀԲ/ երեւանյան գրասենյակի ղեկավար Ժան Միշել Հապպիին, ծրագրի ղեկավար Վիքրամ Քուտարիին, Համաշխարհային բանկի երեւանյան գրասենյակի այլ ներկայացուցիչների: Ժան Միշել Հապպին նախարարին շնորհակալություն է հայտնել ընդունելության համար, ապա ընդգծել, որ ՀԲ-ի, Տրանսպորտի եւ կապի նախարարության միջեւ տարբեր ծրագրերի շուրջ ստեղծված համագործակցությունն արդյունավետ աշխատանքի շատ լավ օրինակ է:

Նա Գագիկ Բեգլարյանին ներկայացրել է ՀԲ-ի «Կենսական նշանակության ճանապարհային ցանցի բարելավման» նոր ծրագրի առանձնահատկությունները, եւ համոզմունք հայտնել, որ նախարարի ղեկավարությամբ առաջիկայում հնարավոր կլինի ծրագիրը կյանքի կոչել:
Նախարար Գագիկ Բեգլարյանը ողջունել է ծրագրի իրականացմանն ուղղված աշխատանքները: «Ես մանրամասն ուսումնասիրել եմ այն եւ ծրագրի իրագործման հարցում որեւէ խնդիր չեմ տեսնում։ Պարզապես նախագծային աշխատանքները պետք է արագացնել, որպեսզի շինարարության մեկնարկը տրվի գարնան սկզբին»,-ընդգծել է նախարարը:

Ծրագրի ղեկավար Վիքրամ Քուտարին վստահեցրել է, որ նախապատրաստական աշխատանքներն ընթանում են բնականոն հունով:
Նախագծի հիմնական նպատակն է բարելավել գյուղական համայնքների հասանելիությունը դեպի շուկաներ եւ տարբեր ծառայություններ: Ծրագիրը հիմնված է երկու բաղադրիչի վրա՝ կենսական նշանակության ճանապարհների վերականգնում եւ ծրագրի կառավարում: Կֆինանսավորվեն նաև ճանապարհի անվտանգությանն ու հանրային իրազեկվածությանն ուղղված մի շարք ուղղություններ:
Հանդիպման ընթացքում քննարկվել են նաեւ երկկողմ հետաքրքրություն ներկայացնող այլ հարցեր: