Հողատարածքի սեփականության իրավունքի պետական գրանցում՝ Պաշտպանի միջամտությամբ

Կադաստրի պետական կոմիտեի Շիրակի մարզային ստորաբաժանումը շուրջ 6 ամիս է չէր գրանցում Գայանե Միրզախանյանի հողատարածքը:

Գյումրու քաղաքապետի որոշմամբ Գայանե Միրզախանյանի 300 քմ մակերեսով հողամասի նկատմամբ ճանաչվել էր սեփականության իրավունք, իսկ մյուս 204.34 քմ մակերեսով հողամասը վաճառքի միջոցով տրվել էր նրան:

Գայանե Միրզախանյանը հողամասի առքուվաճառքի պայմանագիրը վավերացրել էր նոտարական կարգով, կատարել էր բոլոր անհրաժեշտ վճարումները, որից հետո դիմել էր Կադաստրի պետական կոմիտեի աշխատակազմի Շիրակի մարզային ստորաբաժանում՝ առքուվաճառքի պայմանագիրը գրանցելու նպատակով, սակայն մերժվել էր՝ քաղաքացուն անհասկանալի պատճառաբանությամբ, Պաշտպանին ուղղված իր դիմումում հայտնել է Գայանե Միրզախանյանը:

Դիմումում բարձրացված հարցի կապակցությամբ Պաշտպանը գրություն է ուղարկել Կադաստրի պետական կոմիտեի նախագահին՝ խնդրելով պարզաբանել, թե ինչու են Գայանե Միրզախանյանին մերժել՝ ներկայացնելով պատճառաբանություններ, որոնք չեն առնչվում նրա դիմումի հետ:

Ի պատասխան՝ կոմիտեի նախագահը հայտնել է, որ խնդրո առարկա հանդիսացող գույքը ենթակա է իրավունքի պետական գրանցման և քաղաքացին կոմիտեի աշխատակազմի ցանկացած սպասարկման գրասենյակ դիմում ներկայացնելու դեպքում կստանա իրավունքի պետական գրանցում:

Գայանե Միրզախանյանը մեզ հայտնել է, որ դիմում է ներկայացրել Կադաստրի պետական կոմիտե և իրականացվել է իր հողատարածքի իրավունքի պետական գրանցումը: Քաղաքացու անուն-ազգանունը փոխված է: