Գերմանիայի դեսպանը ՀՀ Ազգային ժողովում

Հոկտեմբերի 19-ին ՀՀ ԱԺ նախագահ Հովիկ Աբրահամյանն ընդունեց ՀՀ-ում ԳԴՀ արտակարգ եւ լիազոր դեսպան Ռայներ Մորելին:

Ողջունելով դեսպանին եւ հաջողություններ մաղթելով նրան իր դիվանագիտական առաքելության մեջ՝ ՀՀ ԱԺ նախագահը գոհունակությամբ փաստեց, որ երկու երկրների միջեւ հարաբերությունները բոլոր ուղղություններով կայուն զարգանում են: Նա բարձր գնահատեց առկա քաղաքական, առեւտրատնտեսական եւ մշակութային փոխգործակցությունը: Հովիկ Աբրահամյանը ուրախությամբ փաստեց, որ միջխորհրդարանական հարաբերությունները ակտիվանում եւ ամրապնդվում են: Աժ նախագահը անհրաժեշտ համարեց փոխգործակցության ակտիվացումը ոչ միայն երկկողմ այլ նաեւ բազմակողմ ձեւաչափերով:

Շնորհակալություն հայտնելով ընդունելության համար՝ Գերմանիայի դեսպանը կարեւորեց երկկողմ հարաբերությունների հետագա զարգացումը եւ խորացումը, միջխորհրդարանական համագործակցության ակտիվացումը: Նրա խոսքով՝ Գերմանիան մեծապես կարեւորում է Հայաստանի հետ փոխգործակցության զարգացումը տարբեր ուղղություններով:

Զրուցակիցները կարեւորեցին «Միջազգային խորհրդարանական կրթաթոշակ» ծրագիրը, որը գործում է 1998 թ.-ից, եւ հայաստանցի բազմաթիվ երիտասարդներ պրակտիկա են անցել Բունդեսթագում: Այս համատեքստում Հովիկ Աբրահամյանը նշեց, որ Գերմանիայի Բունդեսթագի նախագահ Լամմերթի հետ պայմանավորվածություն է ձեռք բերվել Հայաստանի Ազգային ժողովում նմանատիպ ծրագրի իրականացման հնարավորության մասին. արդեն կայացել են գործնական բանակցություններ Ազգային ժողովի աշխատակազմի եւ Գերմանիայի դեսպանության ներկայացուցիչների միջեւ՝ ՀՀ Ազգային ժողովում պրակտիկա անցնելու նպատակով 2013 թվականից Գերմանիայի 2 շրջանավարտ ընդունելու վերաբերյալ: «Սա եւս մեկ քայլ է միջխորհրդարանական համագործակցությունն ամրապնդելու ուղղությամբ»,-նշեց Հովիկ Աբրահամյանը:

Հանդիպման ընթացքում քննարկվեցին տարածաշրջանային խնդիրներ եւ երկկողմ հետաքրքրություն ներկայացնող այլ հարցեր եւս: