Վեճ և կրակոցներ՝ գիշերային ակումբի պարուհիների հանդերձարան մտնելու համար

20-ամյա Անդրանիկ Մարտիրոսյանը օրեր առաջ, ժամը 00:30-ի սահմաններում ցանկացել էր մուտք գործել Երևան քաղաքի Աբովյան 39 հասցեում գտնվող «Կրիստալ» գիշերային ակումբի պարուհիների հանդերձարան: Սակայն ակումբի աշխատակից Գենադի Սամվելի Թովմասյանը նրան թույլ չի տվել ներս մտնել, ուստի քաղաքացիների միջև տեղի է ունեցել վիճաբանություն: 20-ամյա Անդրանիկը, դիտավորությամբ, կոպիտ կերպով խախտելով հասարակական կարգը, խանգարելով ակումբի բնականոն աշխատանքը և բացահայտ անհարգալից վերաբերմունք դրսևորելով հասարակության՝ աշխատողների նկատմամբ, շուրջ 5-10 րոպե տևողությամբ բարձրաձայն սեռական բնույթի անհասցե հայհոյանքներ է տվել:

Այդ ընթացքում իրեն պատկանող՝ «Կառլ 2005 Մագնում-6413» (թույլտվություն թիվ Գ-3402) գործարանային համարի գազային ատրճանակից 2 անգամ կրակ է արձակել դեպի օդ:

Կատարվածի առիթով Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանում դատավոր Մխիթար Պապոյանի նախագահությամբ ընթանում է դատավարություն:

Անդրանիկ Մարտիրոսյանի խափանման միջոց ընտրվել է ստորագրություն՝ չհեռանալու մասին:

Տաթև Հարությունյան՝ aravot.am