«Ժողովուրդ». Ալիկ Սարգսյանի անդրադարձը Գուրգեն Մհերյանի սպանությանը

«Ժողովուրդ»-ի տեղեկություններով` օրերս նոր բացահայտումներ կլինեն ՀՀ ոստիկանապետի տեղակալ Գևորգ Մհերյանի սպանության գործով: Հնարավոր է` նոր անուններ ի հայտ գան, որոնց թվում խոսվում է ՀՀ նախկին ոստիկանապետ Ալիկ Սարգսյանի մասին:

Ստորև ներկայացնում ենք Ալիկ Սարգսյանի հետ թերթի հարցազրույցը.

-Պարո՛ն Սարգսյան, հիշո՞ւմ եք Ձեր հանդիպումը Գրիգոր Իգիթյանի հետ, ի՞նչ եք խոսել նրա հետ։

-Հիշում եմ տենց թեթև, որ Իգիթյան կար, շատ լավ հիշում եմ ու եղբորն էլ շատ լավ ճանաչում եմ։ Հիշում եմ նաև, որ իրեն կանչել եմ իմ մոտ։

-Ինչի՞ համար եք հրավիրել Ձեր աշխատասենյակ։

-Բնականաբար, Մհերյանի գործով ես կասկածում էի իրեն, այդքան բան։

-Բայց ի՞նչ եք խոսել Ձեր նշած «կասկածյալի» հետ, Իգիթյանն ի՞նչ է ասել՝ ի՞նքն է եղել Գևորգ Մհերյանին սպանողը։

-Այսինքն՝ «կասկածում էի», ես նկատի չունեմ, որ մենակ ես էի Իգիթյանին կասկածում, մեզ մոտ ինֆորմացիա կար, որ Մհերյանի և իր միջև լուրջ պրոբլեմներ կային։ Ես էլ Իգիթյանին կանչել եմ իմ աշխատասենյակ և խոսել եմ նրա հետ։

-Ի վերջո, ի՞նչ եղան Ձեր «կասկածները», նա Ձեզ հետ զրույցում հաստատե՞ց այդ տեղեկությունները։

-Ես հիմա չեմ կարող ասել, թե ինչ է եղել, արդեն ահագին ժամանակ է անցել, իսկ ես ահագին ժամանակ է՝ ոստիկանությունում չեմ։ Ուրեմն աշխատում էին, ու այդ գործը շարունակվում էր։ Ձեր հարցերը կարող եք ուղղել այդ գործով քննիչին։

-Իգիթյանը նշում է նաև, որ Մհերյանի սպանության գործում մեծ «դերակատարություն» ունեն ոստիկանական բարձր պաշտոնյաները, ու նաև իրեն ստիպել են, որ ինքն իր վրա վերցնի Մհերյանի սպանությունը: Նշվում Է նաև, որ շուտով նոր բացահայտումներ են սպասվում Մհերյանի սպանության գործով, որտեղ Ձեր անունը ևս «շոշափվելու» է:

-Էդ խոսողները գլխո՞վ են խոսում, թե՞ մարմնի մնացած մասերով: Ի՞նչ ունեի ես այդ մարդու հետ, հազար անգամ ես այդ մասին խոսել եմ, իմ տեղակալն էր Մհերյանը, որի հետ շատ լավ հարաբերություններ ենք ունեցել: Կարո՞ղ եք ասել, թե ես ինչ կապ ունեի Գևորգի հետ: Դրանք ընդամենը անհեթեթություններ են, ու ես Ձեզ խնդրում եմ՝ զբաղվեք Ձեր գործերով: Դրանք սխալ տեղեկություններ են, որոնք չգիտեմ ովքեր են տարածում: Ես ուղղակի արհամարհում եմ նման խոսակցությունները, դրանք ինձ համար անգամ ծիծաղելի են:

-Որպես նախկին ոստիկանապետ՝ կասեք, ըստ Ձեզ, ի՞նչն է պատճառը, որ չեն կարողանում բացահայտել թե իրականում ով կամ ովքեր են սպանել Ձեր տեղակալին:

-Աստված տա՝ շուտ բացահայտվի, թե ով է սպանել Մհերյանին, որքան շուտ բացահայտվի սպանությունը, այդքան ես կշահեմ: Ի վերջո, Մհերյանն իմ տեղակալն է եղել: Նորմալ ու ջահել տղա էր, ո՞վ կուզենար՝ նման բան լիներ: Ես չեմ կարող ոչ մի բան ասել, ի՞նչ ասեմ, միակ բանը, որ կարող եմ ասել, այն է, որ շուտ բացահայտվի այս գործը: Այսքանը: