«ՀԺ». Գուրգեն Մարգարյանի եղբայրն ազատ կարձակվի

Ինչպես և կանխատեսվում էր, դատախազ Ա. Աֆանդյանը երեկ ետ վերցրեց 2004թ.-ին Բուդապեշտում Ռամիլ Սաֆարովի կողմից կացնահարված Գուրգեն Մարգարյանի եղբորը՝ Վահրամ Մարգարյանին անցած տարվա օգոստոսի 2-ին Երևանի Զաքյան փողոցում տեղի ունեցած սպանության առնչությամբ առաջադրված մեղադրանքը: Այսպիսով, Վահրամն այլևս չի մեղադրվում սպանություն կատարելու համար, սակայն, դեռևս մեղադրվում է ապօրինի զինամթերք պահելու համար՝ ՀՀ քրեական օրենսգրքի 235 հոդվածի 1-ին մասով, որը որպես պատիժ նախատեսում է 3 ամսից մինչև 3 տարվա ազատազրկում: «Հայկական ժամանակ»-ը գրում է, որ սպասվում է, որ այս գործով կլինի ևս երկու նիստ, ինչից հետո Վահրամը զենքի վերաբերյալ մեղադրանքով կդատապարտվի առավելագույնը մեկ տարվա ազատազրկման, և քանի որ նա արդեն մեկ տարուց ավելի է, ինչ կալանավորված է, հենց դատարանի դահլիճից ազատ կարձակվի:

Ի դեպ, դատարանում երեկ խիստ ոգևորիչ մթնոլորտ է տիրել, նախատեսված էր, որ դատախազը պետք է մեղադրական ճառ ընթերցի, բայց, փաստորեն, պաշտպանական ճառ է ընթերցել' արձանագրելով նախաքննության և դատաքննության ընթացքում ապացույցների և ցուցմունքների թերությունները: Նման իրավիճակի Հայաստանի դատարաններում ամեն օր չես հանդիպի: