Գալուստ Սահակյանի պատասխանն Անի Քոչարին

Երեկ տարածվել էր մի տեղեկություն, ըստ որի՝ ՀՀԿ կուսակցության փոխնանախագահ Գալուստ Սահակյանը հասարակական վայրերում և ԱԺ-ում թեքահարթակների տեղադրման վերաբերյալ հարցի շուրջ ասել էր. «ԱԺ-ում 1-2 հոգի են ընդամենը հաշմանդամ՝ Արման Մուշեղյանը և էլի մի հոգի, ու իրանց համար ի՞նչ այդքան ծախս անենք, դա լուրջ ծախս է»։

Այսօր Գալուստ Սահակյանը հայտարարություն է տարածել, ըստ որի՝ իր ասածը խեղված է եղել.

«Իմ միտքը խեղել եք։

Պատասխանս եղել է, որ վերջին տարիներին այդ ուղղությամբ լուրջ աշխատանքներ են իրագործվել, բայց դեռ բավարար չէ։ Ազգային ժողովի շենքային պայմանները հնարավորություն չեն տալիս թեքահարթակներ տեղադրելու։

Իսկ այժմ վիրավորում եմ Ձեզ, զուսպ եղեք և փորձեք պրովոկացիան Ձեր հիմնական զբաղմունքը չդարձնել։

Հիշեցնենք, որ Անի Քոչարը Facebook սոցցանցի իր էջում գրել էր. «Սրանց նմանները իրավունք անգամ չունեն նման պաշտոններ զբաղեցնելու և որոշումներ կայացնելու: Դուք ձեր գրպանների, բանկային հաշիվների, զվարճանքների և բարեկեցիկ կյանքի համար միջոցներ ունեք, իսկ ձեր անմիջական պարտականությունների համար ոչ? Հարգելի Գալուստ Սահակյան, առհասարակ տեղյակ եք, որ պարտավոր եք հարմարեցնել, միջազգային կոնվենցիա է ՀՀ ԱԺ-ն վավերացրել: Այնպես եք խոսում, կարծես Արման Մուշեղյանին լավության կարգով պետք է ընդառաջեիք և հարմարեցնեիք: Գիտեք ինչ, հերիք է, մենք էլ համբերություն ունենք, չեմ ամաչի և կասեմ, միայն ցանկանում եմ, որ դուք ամեն Աստծո օր նույն խոչընդոտներն ու հոգեբանական ճնշումները հաղթահարեք, ինչ Արմանս ու իր բախտակից ընկերները: Թող դուք ամեն Աստծո օր նույն կերպ հասնեք ձեր աշխատասենյակ, ինչպես Արման Մուշեղյանը:

Աստված է վկա, դուք բոլոր սահմաններն անցել եք արդեն: Ինչ է, պետք է ձեր սեփական մաշկի վրա զգաք, որ նոր միայն տեղներիցդ շարժվեք??? Հավատացած եղեք, ոչ մեկը, այդ թվում մեծն պաշտոնյաներդ, ապահովագրված չեք հաշմանդամությունից: Դա կարող է մի օր նաև ձեր և ձեր ընտանիքի խնդիրը դառնալ: Քթներիցդ այն կողմ նայեք, մեր երկրում ավելի քան 170 000 հաշմանդամություն ունեցող ՀՀ քաղաքացի կա, ու ձեր նմաններն են նրանց համար որոշումներ կայացնողները և ասողները, թե ինչի համար գումար կա, իսկ ինչի համար՝ ոչ: Որքանով նաև տեղյակ եմ, բոլորովին վերջերս կրկին նոր համակարգիչներ է ԱԺ-ն ձեռք բերել, իսկ թեքահարթակի համար գումար չկա, այո, կամ անիմաստ ծախս է: Դեռ շատ մեծ հարց է ում կամ ինչի անիմաստ լինելը...»։