Գուցե մի օր դառնամ աշխարհի լավագույն ֆուտբոլիստը. Մեզութ Օզիլ

Մադրիդի «Ռեալի» և Գերմանիայի հավաքականի կիսապաշտպան Մեզութ Օզիլը MARCA-ին տված հարցազրույցում խոսել է այն մասին, որ իր համար շատ կարևոր է «Արքայական ակումբում» հանդես գալը:

«Իմ նպատակը  յուրաքանրյուր խաղում լավագույնս հանդես գալն է՝ լինի դա «Ռեռալում», թե Գերմանիայի հավաքականում: Մոուրինիուն ցանկանում է, որ մենք բոլորս լավագույնս հանդես գանք: Իմ նկատմամբ նրա կողմից ճնշում չկա, մարզիչը պարզապես ցանկանում է, որ ես միշտ բարձր մակարդակի վրա լինեմ: Ես հանդես եմ գալիս կիսապաշտպանական գծում, ինչը թույլ է տալիս նաև հարձակվել, դա ինձ մեծ երջանկություն է պատճառում: Երբ խաղում եմ հարձակման գծում, ազատ եմ զգում: Իմ նպատակներից մեկը եղել է Ժոզե Մոուրինիուի համար խաղալը, ես դրան հասել եմ: Հիմա ցանկանում եմ ավելի կատարելագործվել»։

Օզիլն անդրադարձել է նաև «Բարսելոնայի» հետ խաղերին և նշել. «Էլ կլասիկոների ժամանակ այլևս չեմ նյարդայնանում, դա անցյալում էր, հիմա ավելի հանգիստ եմ լինում և կենտրոնացած: Իսկ «Սանտիագո Բերնաբեուում» խաղալիս փշաքաղվում եմ, բայց ոչ թե նյարդայնանալուց, այլ երկրպագուների մեծ աջակցությունից: Ես հպարտանում եմ, որ խաղում եմ  «Ռեալում». ակումբը հիանալի երկրպագուներ ունի, իսկ մարզիչը հավատում է ինձ: Էլ ի՞նչ ցանկանամ»։

Իսկ լրագրողի այն հարցին, թե ինչպես կբացատրի, որ Ռամոսը  կրել է իր մարզաշապիկը, Օզիլը պատասխանել է.

«Կարծում եմ՝ նրան ավելի շատ հարմար է 4-րդ համարի մարզաշապիկը, քան 10-ը: Մենք շատ լավ ընկերներ ենք: Նա ցանկանում էր խփած գոլը ինձ նվիրել, այդ իսկ պատճառով էլ կրել է այն: Մենք բոլորս փոքր ընտանիք ենք: Երբեմն Ռամոսն ինձ լավ է հասկանում: Բայց կարևորն այն է, որ մենք բոլորս ընկերական ենք»։

-Դժվա՞ր է արդյոք խաղալ «Ռեալում»։

«Ո՛չ, սակայն միշտ ուշադրության կենտրոնում ես լինում, նույնիսկ ԱՄՆ-ում են ճանաչում: Երկրպագուների աջակցությունն աներևակայելի է»։

Խոսելով «Ոսկե Գնդակի» մասին՝ Օզիլը նշել է. «Բոլորն էլ երազում են դրա մասին: Գուցե մի օր դառնամ աշխարհի լավագույն ֆուտբոլիստը»։